कांग्रेसद्वारा सत्ता सहकार्य गर्ने सहमति अनुमोदन, राजीनामा दिएर बाटो खुल्ला गर्न प्रधानमन्त्रीसँग आग्रह

१९ असार, काठमाडौं । नेपाली कांग्रेसको कार्य सम्पादन समितिको बैठकले नेकपा एमाले र कांग्रेसबीच सत्ता सहकार्य गर्ने समझदारीलाई अनुमोदन गरेको छ । कांग्रेसले प्रधानमन्त्री पुष्पकमल दाहाल प्रचण्डलाई राजीनामा दिएर मार्ग प्रशस्त गर्न आग्रह गरेको छ । 

आज पार्टी सभापति शेरबहादुर देउवाको निवास बूढानीलकण्ठमा बसेको कार्यसम्पादन समितिको बैठकले एमालेसँगको समझदारीलाई अनुमोदन गरेको हो ।

कार्यसम्पादन समितिको बैठकले पहिले नेकपा एमाले अध्यक्ष केपी शर्मा ओली प्रधानमन्त्री बन्ने सहमति अनुमोदन गरेको हो । कांग्रेस सभापति शेरबहादुर देउवाले दोस्रो चरणमा चुनावी सरकारको नेतृत्व गर्ने सहमति बैठकले अनुमोदन गरेको कांग्रेस प्रवक्ता प्रकाशशरण महतले जानकारी दिए ।
 
कांग्रेस र एमालेको आगामी सरकार निर्माण गरेर जाने समझदारीको स्वागत गरेको बताए । सकेसम्म राष्ट्रिय सहमति जुटाउने, मुद्दामा मिल्ने दललाई समेटेर जाने निर्णय भएको उनले बताए ।

कांग्रेसले प्रधानमन्त्री प्रचण्डलाई राजीनामा दिएर मार्ग प्रशस्त गर्न आग्रह गरेको हो । ठूला दुई दलसँगै मिलेर जाने भनेपछि स्वभाविक रूपमा मार्ग प्रशस्त गर्न उपयुक्त हुन्छ । बैठकले मार्ग प्रशस्त गर्न आग्रह गर्ने निर्णय गरेको महतले बताए । प्रधानमन्त्रीले मार्ग प्रशस्त नगरे संवैधानिक प्रक्रिया आफ्नो ठाउँमा रहेको उनको भनाइ छ ।