सभापति लामिछानेले पढ्न रोकेपछि सहमहामन्त्रीले पढे महामन्त्री ढकालको प्रतिवेदन

१९ असार, काठमाडौं । राष्ट्रिय स्वतन्त्र पार्टी (रास्वपा) का महामन्त्री मुकुल ढकाललाई केन्द्रीय समितिको बैठकमा प्रतिवेदन पढ्न रोक लगाइएको छ ।

सभापति रवि लामिछानेले बैठकमा महामन्त्री डा. मुकुल ढकाललाई आफ्नो प्रस्ताव पेश गर्ने अनुमति नदिएका हुन् । सचिवालय बैठकले समीक्षा प्रतिवेदन महामन्त्रीको तर्फबाट प्रस्ताव पेश गर्ने निर्णय गरेपनि आज सभापति लामिछानेले रोकेका हुन् ।

महामन्त्री ढकालले आफूलाई लिखित प्रस्ताव राख्न नदिइएकोबारे सार्वजनिक गरेका छन् । महामन्त्री ढकालका अनुसार पार्टीको जारी केन्द्रीय समितिमा समीक्षा प्रतिवेदनका आधारमा महामन्त्रीको प्रस्ताव पेस गर्न मंगलबारको सचिवालय बैठकबाट अनुमति दिइएको थियो । तर, बुधबारको केन्द्रीय समिति बैठकमा भने लिखित प्रस्ताव राख्न अनुमति नदिइएको उनले बताए । 

समीक्षा प्रतिवेदनका आधारमा पार्टी महामन्त्रीको तर्फबाट प्रस्ताव पेस गर्न हिजो सचिवालयको बैठकमा अनुमति दिएको थियो तर, लिखित प्रस्ताव तयार पारिए पनि पेस गर्ने अनुमति सभापतिले दिनु भएन, महामन्त्री ढकालले भने, प्रतिवेदनका आधारमा तयार गरिएको प्रस्तावमा पार्टीलाई रविको पार्टी नभएर राष्ट्रिय स्वतन्त्र पार्टी बनाउनु पर्ने कुरा उल्लेख छ ।

बैठकको लाइभ गर्न नदिएपछि आफ्नो लोकतान्त्रिक अधिकार हनन् भएको भन्दै उनी मुखमा कालो टेप टाँसेर मौन बसेका छन् । महामन्त्री ढकालको प्रतिवेदन सहमहामन्त्रीले बैठकमा पढेर सुनाए । प्रतिवेदन पढिसकेपछि अहिले खाजा ब्रेक भएको छ । खानापछि सुरू हुने बैठकमा प्रतिवेदनमाथि छलफल हुनेछ ।