कांग्रेस कम्युनिष्टसँग मिल्नु राम्रो होइनः शशांक कोइराला

१९ असार, विराटनगर । नेपाली कांग्रेसका केन्द्रीय सदस्य डा. शशांक कोइरालाले कांग्रेस कम्युनिष्टसँग मिल्नु राम्रो नभएको बताएका छन् । कांग्रेस र एमालेबीच भएको सहमतिलाई लिएर कोइरालाले यस्तो भनाई राखेका हुन् । सरकार गठनकै लागि दुई ठूला दल मिल्दा मुलुक एकतन्त्रीय शासनतर्फ जानसक्ने खतरा बढ्ने बताएका छन् । 

नेपाल प्रेस युनियन सुनसरीले बुधबार इटहरीमा आयोजना गरेको पत्रकार भेटघाट कार्यक्रममा कोइरालाले लोकतन्त्रको सुन्दर पक्ष भनेको बलियो विपक्षी भएको बताए । दुई ठूला दल कांग्रेस र एमाले मिलेर सरकार बनाउँदा लोकतन्त्र कमजोर बन्नसक्ने उनले बताए । सत्तापक्षको कमजोरीमा प्रश्न उठाउन नसक्ने विपक्षी भए कसरी लोकतन्त्र बलियो हुन्छ भन्दै कोइरालाले प्रतिप्रश्न गरे । 
 
कांग्रेसकै कारण कम्युनिष्ट स्थापित भएको दाबी गर्दै कोइरालाले नेपालमा कम्युनिस्टसँग मिल्नु हुन्न भन्ने पक्षमा आफ्नो मान्यता रहेको सुनाए । चुनाव हार्नासाथ उनीहरूसँग मिल्नुपर्ने केही कारण छैन । संघीयता कार्यान्वयनमा देखिएको समस्या समाधान गर्न विकेन्द्रीकरणलाई पूर्ण रूपमा लागु गर्नुपर्ने कोइरालाको सुझाव थियो । 

राजनीतिक दलहरूले समेत आन्तरिक रूपमा विकेन्द्रीकरण अनुशरण गर्दै कार्यान्वयनमा जानुपर्ने कोइरालाले बताए । पार्टीको आन्तरिक लोकतन्त्र विकेन्द्रीकरणबाटै थप सुदृढ हुने उनको भनाइ छ ।