प्रधानमन्त्रीले राजीनामा नदिए एमालेले सरकारलाई दिएको समर्थन र मन्त्री एकसाथ फिर्ता गर्ने

१९ असार, काठमाडौं । नेकपा एमालेले आफूले गरेको आग्रहअनुसार प्रधानमन्त्री पुष्पकमल दाहाल प्रचण्डले राजीनामा नदिए सरकारलाई दिएको समर्थन फिर्ता लिएर आफ्ना मन्त्रीहरु बोलाउने भएको छ । एमाले नेताले दिएको जानकारी अनुसार बुधबार साँझसम्ममा पार्टीको निर्णय आउनेछ । 

एमाले सचिवालय बैठकले आजसम्म पदबाट राजीनामा गर्न प्रधानमन्त्री प्रचण्डलाई आग्रह गरेको र सो समय गुज्रिए मन्त्रीहरु फिर्ता बोलाउने उनले बताए । प्रधानमन्त्री प्रचण्डले राजीनामा नगर्ने अडान लिएपछि एमालेले समर्थन फिर्ता लिने तयारी पनि गरेको छ ।

संसद्का दुई ठूला दल मिलेर जाने निर्णय भएपछि प्रधानमन्त्रीले राजीनामा गरेर सहयोग गर्नुपर्ने एमालेको भनाइ छ । प्रधानमन्त्री दलको आग्रहविपरित प्रक्रियामा जाने भए आजै समर्थन फिर्ता लिने तयारमा एमाले बसेको छ । मन्त्रीहरु पनि फिर्ता हुनेछन् । 

एमालेले आज समर्थन फिर्ता र मन्त्रीहरुको राजीनामाबारे निर्णय गर्दैछ । सोमबार नेपाली कांग्रेस र एमालेबीच नयाँ सरकार बनाउने सहमति जुटेपछि प्रधानमन्त्री प्रचण्डलाई राजीनामा गर्न आग्रह गरिएको हो । तर, प्रधानमन्त्रीले विश्वासको मत फेस गर्ने मनसाय देखाएका छन् ।