गुठीको जग्गामा अख्तियारकी आयुक्तको घर, ललितपुर महानगरले चलायो डोजर

१९ असार, काठमाडौं । गुठीको जग्गा मिचेको भन्दै ललितपुर महानगरपालिकाले अख्तियार दुरुपयोग अनुसन्धान आयोगकी आयुक्त डा. सुमित्रा अमात्यको घरको पर्खाल भत्काएको छ । ललितपुर महानगरपालिका–१० चाकुपाटस्थित डा. अमात्यको घरको कम्पाउन्ड पर्खाल बुधबार दिउँसो महानगरपालिकाको टोलीले डोजर लगाएर भत्काएको हो ।

अमात्यले गुठीको जग्गा मिचेको पाइएपछि ललितपुर महानगरपालिकाले डोजर चलाएको जानकारी दिएको छ । ललितपुर महानगरपालिकाका मेयर चिरिबाबु महर्जनले आफै उपस्थिति भएर डोजर चलाउन निर्देशन दिएका थिए । गुठीयार, आयुक्तको परिवार र महानगरबीच पटक पटक छलफल गरेर जग्गा खाली गराउन आग्रह गरिएको भए पनि अटेरी गरेपछि डोजर चलाउनुपरेको महानगरले जनाएको छ ।

ललितपुर महानगरका मेयर चिरिबाबु महर्जनले गुठीको जग्गा भएको र गुठीयारले पटक  पटक अनुरोध गर्दा पनि नमानेपछि भत्काउनुपरेको बताए । यो देवस्थलको जग्गा थियो । महर्जन र अमात्य गुठी थियो । जहाँ भोज खाने र पूजा गर्ने स्थान थियो । त्यही नै हडपेको पाइयो । सम्पदा मिचेर पर्खाल बढाउने र ढोका राख्न अनुमति नदिँदा पनि बनाएपछि भत्काउनुपरेको हो, उनले भने । 

महर्जन र अमात्य गुठीका पदाधिकारी पटक पटक महानगरसँग अनुरोध गर्न आएका थिए । स्थानीयले पनि आफूहरूको आग्रहमा ललितपुर महानगरले अवैध संरचना भत्काइदिएको बताएका छन् ।