यता र उता गरेर प्रचण्डले आजित बनाए, राजनीतिक स्थायित्वका लागि यो गठबन्धन बनाएको होः कोइराला

२० असार, वीरगञ्ज । नेपाली कांग्रेसका वरिष्ठ नेता डा. शेखर कोइरालाले नेकपा माओवादीका अध्यक्ष एवं प्रधानमन्त्री पुष्पकमल दाहाल प्रचण्डले अस्थिर ढंगले कहिले यता र कहिले उता गर्दै राजनीतिमा अस्थिरता आउने गरी गठबन्धन फेर्दै आजित बनाएकाले कांग्रेस र एमाले मिलेर सरकार बनाउनुपर्ने परिस्थिति निर्माण भएको बताएका छन् । उनले अब राजनीतिक स्थायित्वका लागि संविधान संशोधन आवश्यक रहेको बताएका छन् ।

कांग्रेस पर्साले बिहीबार वीरगञ्जमा गरेको कार्यक्रममा बोल्दै कोइरालाले अहिले रहेको मिश्रित निर्वाचन प्रणाली हटाएर प्रत्यक्ष मात्रै राख्नुपर्ने बताए । उनले देशको प्राथमिकता राजनीतिक स्थायित्व, सुशासन र विकास भएको भन्दै समानुपातिक र समावेशी कुरालाई मिलाएर प्रदेशदेखि संघसम्म प्रत्यक्ष निर्वाचनमा जाने र जुन पार्टीले जित्छ उसले सरकार बनाउने गरी व्यवस्था गर्नुपर्ने बताए । 

गठबन्धन फेर्दै प्रचण्डले दुई ठूला पार्टी नेपाली कांग्रेस र एमालेलाई आजित बनाइसकेको उनको भनाइ छ । कांग्रेससँग गठबन्धन गरेर ३२ सिट ल्याए, सरकार बनाउने बेला एमालेसँग मिले । एमालेसँगै मिलेर गएको भए भइहाल्थ्यो, हामी प्रतिपक्षमा बस्थ्यौँ । दुई महिनापछि कांग्रेससँग मिल्यो भने फेरि एमालेसँग मिल्यो । त्यसपछि हामीले सोचेर, विचार गरेर नै कांग्रेस र एमाले समीकरण गर्ने सहमति गरेको हो, उनले भने । 

एमालेसँग समीकरण गर्ने कुरामा आफ्नो ठूलो भूमिका रहेको उनले बताए । सभापति शेरबहादुर देउवाको एकल निर्णय नभएको भन्दै उनले संविधान सुधार नगरी देश चल्न सक्दैन भनेर हामी सबैले कुरा गरेर यो सहमति गरेको बताए । एमालेसँग केही समयअघि नै कांग्रेसले समीकरण गर्नुपर्नेमा ढिलो भएको पनि कोइरालाले बताए । संविधानमा त्रुटि भए पनि यसलाई धेरै चलाउन नहुने उनको भनाइ छ ।