सहकारी ठगीका विषयमा छलफल गर्न छानबिन समितिले बोलायो प्रहरी प्रमुख र गृहसचिव

२० असार, काठमाडौं । प्रतिनिधि सभाबाट सहकारी संस्थाको वचत रकम दुरुपयोग सम्बन्धमा छानबिन गर्न गठन भएको संसदीय विशेष छानबिन समितिले गृह मन्त्रालयका सचिव एकनारायण अर्याल र प्रहरी महानिरीक्षक बसन्त कुँवरलाई शुक्रबार छलफलका लागि बोलाएको छ ।

संसदीय समितिका संयोजक सूर्य थापाले नेपालबहसलाई दिएको जानकारी अनुसार अहिले प्रहरीले कुन कुन सहकारीको रकम अपचलन भएको विषयमा अनुसन्धान गरिरहेको छ । कुन सहकारी संस्थाका पीडितले कस्तो उजुरी दिएका छन भन्ने विषयमा जानकारी लिन बोलाइएको हो । 

सीआईबीले हेरिरहेको सहकारीसँग सम्बन्धित मुद्दाहरूको बारेमा पनि समितिले जानकारी लिने भएको छ । अहिले देशभरका धेरै सहकारीबाट रकम ठगी भएको भन्दै प्रहरीमा उजुरी परेको र ती उजुरीमाथि प्रहरीले अनुसन्धान पनि गरिरहेको छ । समितिले गृहमन्त्री रवि लामिछानेका सम्बन्धमा परेका उजुरीबारे पनि जानकारी लिने भएको छ । अनुसन्धान भइरहेका विषय र थप रणनीति बनाएर गर्नुपर्ने छानबिनका विषयमा छलफल गर्न अर्याल र कुँवरलाई बोलाएको हो ।