सात वटै प्रदेश सरकारमा माओवादीको उपस्थिति शून्य रहने

२१ असार, काठमाडौं । नेपाली कांग्रेस र नेकपा एमाले मिलेर गठबन्धन बनेपछि अब माओवादीले सात वटै प्रदेश सरकारबाट हात धुनुपर्ने अवस्था आएको छ । उसले नेतृत्व गरेका दुई प्रदेश पनि गुम्नेछन् । बागमती प्रदेश सरकारबाट शुक्रबार एमाले बाहिरिएपछि तीन वटा प्रदेशका मुख्यमन्त्री कामचलाउ हैसियतमा हुनेछन् । सुदूरपश्चिम र लुम्बिनी प्रदेशबाट एमालेले समर्थन फिर्ता लिएर मन्त्रीहरुले राजीनामा बुझाई सकेका छन् । 

केन्द्रमा राजनीतिक समीकरण फेरिएसँगै प्रदेशमा पनि यसको असर देखिएको हो । एमाले लुम्बिनी र सुदूरपश्चिम प्रदेश सरकारबाट बाहिरि सकेको छ भने बागमतीमा आज साझसम्ममा राजीनामा आउने एमाले मन्त्रीहरूले बताएका छन् । बागमतीमा मुख्यमन्त्री जम्कट्टेल नेतृत्वको सरकारलाई नेकपा एमालेले मुख्य रूपमा साथ दिएको थियो । कांग्रेससँग नयाँ गठबन्धन बनाउने भएपछि एमाले बागमती सरकारबाट बाहिरिन भएको हो । 

एमाले सांसद एवं प्रदेशका वन तथा वातावरण मन्त्री केशव प्रसाद पोखरेलका अनुसार आज सरकार छोड्ने सम्भावना छ । यसपछि केन्द्रमा सरकार निर्माण प्रक्रिया अघि बढे लगत्तै प्रदेश सरकारका बारेमा निर्णय हुनेछ । केन्द्रको समीकरण अनुसार नै सरकार निर्माण र पावर सेयरिङका बारेमा सहमतिको खाका तयार भएकाले सोही अनुसार नै अघि बढ्ने उनले बताए । 

सुदूरपश्चिम, लुम्बिनी र बागमतीबाट एमाले फिर्ता भएपनि मधेश प्रदेशमा भने तत्काल सरकार फेरिने देखिँदैन । मधेशमा दुई दललाई अरूको पनि साथ चाहिन्छ । यस्तै कोशी, गण्डकी र कर्णालीको नेतृत्व पनि परिवर्तन नहुने अवस्था छ । कोशीमा एमालेका हिक्मत कार्की, कर्णालीमा यामलाल कँडेल र गण्डकीमा कांग्रेसका सुरेन्द्र पाण्डे मुख्यमन्त्री छन्, त्यहाँ एमालेले सघाएपछि सरकार जोगिन्छ ।

केन्द्रमा राजनीतिक समीकरण फेरिएसँगै  एमाले सुदूरपश्चिम प्रदेश सरकारबाट बाहिरिएको छ । बिहीबार समर्थन फिर्ता लिएको एमालेले सरकारमा सहभागी आफ्ना मन्त्रीलाई पनि फिर्ता बोलाएर समर्थन फिर्ता लिएको हो । योसँगै मुख्यमन्त्री दीर्घबहादुर सोडारी नेतृत्वको सरकार अल्पमतमा परेको छ ।

एमालेका मन्त्रीहरूले मुख्यमन्त्रीको सचिवालयमा राजीनामा–पत्र बुझाएका थिए । आर्थिक मामिलामन्त्री सुरेन्द्रबहादुर पाल, आन्तरिक मामिलामन्त्री हीरा सार्की र वन, वातावरण तथा सहकारीमन्त्री वीरबहादुर थापाले राजीनामा बुझाएका हुन् । उनीहरू गत २८ जेठमा मन्त्री नियुक्त भएका थिए । विनाविभागीयमन्त्रीको शपथ लिएका सार्की र थापाले चार दिनअघि मात्र मन्त्रालयको जिम्मेवारी पाएका थिए । 

जनता समाजवादी पार्टी (जसपा) नेपालले समर्थन फिर्ता लिएपछि अल्पमतमा रहेका लुम्बिनीका मुख्यमन्त्री जोखबहादुर महराले ९ साउनभित्र विश्वासको मत लिनुपर्ने थियो । जसपा नेपालकी सांसद अम्बिका काफ्लेले असार ९ मा समर्थन फिर्ता लिएपछि मुख्यमन्त्री महरा विश्वासको मत लिने तयारीमा थिए । केन्द्रमा गठबन्धन नै फेरिएर बिहीबार एमाले लुम्बिनी सरकारबाट बाहिरिनुको साथै समर्थन फिर्ता लिएको छ । महरा मन्त्रिपरिषदमा एमालेका पाँच मन्त्री थिए । 

लुम्बिनी र बागमती प्रदेशमा माओवादीको नेतृत्व थियो । यी दुई प्रदेशबाट मुख्यमन्त्री गएपछि अरु कुनै पनि प्रदेशमा उसको उपस्थिति नरहने देखिएको छ । मधेशमा पनि माओवादी प्रतिपक्षमा जानुपर्नेछ । यसैले केन्द्रसहित सबै प्रदेशमा अब माओवादीको शून्यकै अवस्थामा पुगेको छ ।