नियुक्तिका लागि अन्तरिम आदेश भए सन्तोष र मुक्तिनाथ मध्ये एकजना बन्नेछन् धितोपत्रको अध्यक्ष

२१ असार, काठमाडौं । सर्वोच्च अदालतमा शुक्रबार धितो पत्र बोर्डको अध्यक्ष नियुक्ति विवाद सम्बन्धी रिटमा सुनुवाइ हुँदैछ । यो रिट न्यायाधीश सपना प्रधान मल्ल र बालकृष्ण ढकालको इजलासमा परेको छ । अध्यक्ष नियुक्तिका लागि अन्तरिम आदेश भएमा धितो पत्र बोर्डको अध्यक्ष छनोट समितिले गरेको सर्टलिस्टमा परी कार्यपत्र समेत प्रस्तुत गरिसकेका मध्येबाट एक जनाको अध्यक्षमा नियुक्ति हुनेछ । 

अध्यक्ष छनोटको प्रक्रिया रद्द भएपछि असार १७ गते अध्यक्षका आकांक्षी मध्येका सन्तोषनारायण श्रेष्ठले सर्वोच्चमा रिट दायर गरेका थिए । उनले दायर गरेको रिटमा १८ गते न्यायाधीश अब्दुल अजिज मुसलमानको इजलासले अल्पकालीन अन्तरिम आदेश जारी गरेको थियो । आज अन्तरिम आदेश प्रयोजनका लागि दुवै पक्षलाई डाकिएको छ । आज हुने आदेशअनुसार अध्यक्ष नियुक्तिका लागि पुनः प्रक्रियामा जानेकी अन्तर्वार्तामा सहभागी मध्येबाट बनाउने भन्ने टुंगो लाग्नेछ । 

अध्यक्ष नियुक्तिका लागि अन्तरिम आदेश भएमा धितो पत्र बोर्डको अध्यक्ष छनोट समितिले गरेको सर्टलिस्टमा परी कार्यपत्र समेत प्रस्तुत गरिसकेका सन्तोष नारायण श्रेष्ठ र मुक्तिनाथ श्रेष्ठ मध्येबाट एक अध्यक्ष नियुक्ति हुनेछ । यसअघि छनोट समितिले पाँच जनाको सर्टलिस्ट गरेकोमा तीन जना कार्यपत्र प्रस्तुति र अन्तर्वार्तामा अनुपस्थित भएका थिए । 

कम्तीमा तीन जना समितिले सिफारिस गर्नुपर्ने कानुनी व्यवस्था देखाएर नियुक्ति प्रक्रिया रद्द गरिएको थियो । त्यसविरुद्ध सर्टलिस्टमा परेर कार्यपत्र र कार्ययोजना समेत प्रस्तुत गरेका श्रेष्ठ रिट लिएर सर्वोच्च पुगेका थिए ।