सहकारी ठगी सम्बन्धका कारवाही बारे प्रहरी प्रमुख र गृहसचिवसँग संसदीय समितिले लियो जानकारी

२१ असार, काठमाडौं । देशभरका सहकारी संस्थाबाट भएको बचत दुरुपयोग र ठगीका सम्बन्धमा भइरहेको काम कारबाहीका विषयमा शुक्रबार संसदीय छानबिन विशेष समितिले गृह मन्त्रालयका सचिव एकनारायण अर्याल र प्रहरी महानिरीक्षक बसन्तबहादुर कुँवरसँग सोधपुछ गरेको छ ।

सहकारीबाट परेका उजुरीको अवस्था, सीआईबीले गरिरहेको अनुसन्धान र आगामी रणनीतिका विषयमा समितिले जानकारी लिएको हो । सहकारीको बचत ठगीका विषयमा आएका उजुरीलगायतका केन्द्रित रहेर समितिले उनीहरूसँग सोधपुछ गरेको जानकारी दिएको छ । समितिले गृह सचिव र आइजीपीलाई शुक्रबारको बैठकमा उपस्थित हुन बिहीबार आग्रह गरेको थियो ।

संसदीय समितिले समस्याग्रस्त २९ वटै सहकारी सञ्चालकहरूलाई पनि समितिमा उपस्थित हुन आग्रह गरेको छ । सहकारीको बचत ठगी प्रकरणमा उपप्रधान तथा गृहमन्त्री रवि लामिछानेको संलग्नता देखिएको भन्दै नेपाली कांग्रेसले सदनमा आवाज उठाएपछि संसदीय छानबिन समिति गठन भएको थियो ।