लुम्बिनीमा सरकार बनाउन एमालेले थाल्यो पहल, प्रदेश प्रमुखलाई प्रक्रिया सुरु गर्न पत्र

२१ असार, बुटवल । नेकपा एमालेले लुम्बिनी प्रदेशमा नयाँ सरकार गठनको प्रक्रिया थाल्न आग्रह गर्दै प्रदेश प्रमुखलाई पत्र बुझाएको छ । मुख्यमन्त्री जोखबहादुर महरालाई दिएको समर्थन फिर्तासँगै पार्टीबाट सरकारमा सहभागी मन्त्रीहरूको राजीनामा समेत बुझाएको एमालेले आफ्नो नेतृत्वमा राष्ट्रिय सहमतिको सरकार गठनको प्रक्रिया सुरू गर्न प्रदेश प्रमुखलाई पत्र बुझाएको हो । 

बिहीबार साँझ लुम्बिनी प्रदेश सरकारलाई दिएको समर्थन फिर्ता लिएको थियो । शुक्रबार एमालेले नयाँ सरकार गठनको पहल सुरू गरेको हो । एमाले प्रमुख सचेतक तुलसीप्रसाद चौधरीले मुख्यमन्त्री जोखबहादुर महरा नेतृत्वको सरकारलाई दिएको समर्थन फिर्ता गरेको, एमालेका सबै मन्त्रीले राजीनामा दिएको र अब एमालेको नेतृत्वमा सहमतिको सरकार गठन गर्ने प्रक्रिया सुरु गरिएको भन्दै प्रदेश प्रमुखको कार्यालयमा पत्र बुझाएको जानकारी दिए । 

प्रदेश प्रमुख अमिक शेरचन भने बिरामी भएर उपचारका लागि केही दिनदेखि काठमाडौंमा रहेका छन् । उनका स्वकीय सचिव वसन्त भट्टचनले एमालेले पत्र बुझाएको जानकारी दिए । बिहीबारदेखि माओवादी नेतृत्वको लुम्बिनी सरकार अल्पमतमा परेको छ ।