सहकारी ठगीः ११ अर्ब ६६ करोड रकम दाबिसहित ५५ हजार ४ सय पीडितले दिए उजुरी, ९८ मुद्दा कारवाहीमा

२१ असार, काठमाडौं । प्रतिनिधि सभाबाट गठन भएको विशेष संसदीय छानबिन समितिले सहकारीमा आफ्नो बचत दुरुपयोग ठगी भएको भन्दै हालसम्म ५५ हजार ४१० जना पीडितले उजुरी दर्ता गरेको बताएको छ । शुक्रबार गृहसहित सुरक्षा निकायका अधिकारीहरूसँग छलफल गरेपछि समितिले यो जानकारी गराएको हो । 
उजुरीमा पीडितहरूले ११ अर्ब ६६ करोड ४७ लाख रकम फिर्ता हुनुपर्ने माग गरेका छन् । समितिले सहकारीको बचत ठगी र परेका उजुरीका सम्बन्धमा आज गृहसचिव एकनारायण अर्याल, प्रहरी महानिरीक्षक वसन्तबहादुर कुवँर, सीआईबी प्रमुख श्याम ज्ञवाली, अपराध अनुसन्धान विभाग प्रमुख टेकबहादुर तामाङलगायतका अधिकारीसँग छलफल गरेको थियो ।
 
समितिका संयोजक सूर्य थापाले सहकारीसँग सम्बन्धित रहेर पाँच हजार ३०० उजुरी दर्ता भएको जानकारी समितिमा आएको  बताए । तीमध्ये ९८ उजुरीमा प्रशासनले मुद्दा अघि बढाएको छ । अपराध अनुसन्धान विभाग र सीआईबी दुवैले आफ्नो काम अन्तर्गत अनुसन्धान गरेको भन्दै थापाले कार्यादेशमा अधिकारप्राप्त २९ वटा सहकारी केन्द्रित छलफल भएको बताए । 

उजुरीहरूको अवस्था हेर्दा सबैभन्दा बढी काठमाडौंमा ४० सहकारीबाट पाँच हजार ६४८ जना ठगिएको, ठगीमा संलग्नमध्ये २९४ जना पक्राउ परेको र ८५६ जना फरार रहेको गृह प्रशासनले छलफलमा जानकारी गराएको थियो । यसअघि समितिले सहकारीका माथिल्ला निकायसँग छलफल गरेको थियो ।