महिलाको ३३ र दलितको १४ प्रतिशत सीट सुरक्षित गरेर समानुपातिक प्रणाली हटाउनुपर्छः कोइराला

२१ असार, काठमाडौं । नेपाली कांग्रेसका नेता शेखर कोइरालाले महिला र दलितको कोटा सुरक्षित गरेर संविधानबाट समानुपातिक प्रणाली हटाउनुपर्ने बताएका छन् । उनले संविधान संशोधन गर्दा समानुपातिक प्रणाली हटाउनुपर्ने र त्यो हटाउँदा संविधानको मर्मलाई मर्न दिनु नहुनेमा जोड दिएका छन् । 

शुक्रबार काठमाडौंमा भएको एक कार्यक्रममा प्रधानमन्त्री पुष्पकमल दाहालले राजीनामा दिइनसकेको अवस्थामा विश्वासको मत लिएर विश्वासको मत नपाउँदा संविधानको धारा ७६ को उपधारा ३ मा नजाओस् भन्ने आफ्नो चाहना रहेको बताए । उनले संविधानलाई सबैले मान्नुपर्ने बताए ।

समावेशी समानुपातिक मर्म मर्न नदिन महिला र दलितलाई महिलाको ३३ प्रतिशत र दलितको १४ प्रतिशत सीट सुरक्षित गरेर प्रतिस्पर्धा गराउनुपर्ने बताए । महिलाको बीचमा प्रतिष्पर्धा गरौँ । दलितको बीचमा प्रतिष्पर्धा गरौँ । यो कुरालाई अघि बढाउँ भन्ने लाग्यो र धेरै पहिलादेखि नै बोलेको थिएँ । साथीहरुसँग कुरा गर्दा यो कुरा सकारात्मकरुपले अघि बढेको छ, उनले भने । 

उनले यो समीकरणप्रति अहिले नै खुसी हुनसक्ने अवस्था नभएको बताए । कोइरालाले भने, ‘अहिले प्रचण्डजीले आजको दिनसम्म पनि राजीनामा दिनुभएको छैन । राजीनामा नदिएपछि संविधानतः के हुन्छ ? भन्ने हामीले सोच्नुपर्छ । किनभने संविधानलाई टेकेर हिँड्नुपर्छ । टेकेर हिँड्दा प्रचण्डजीले राजीनामा दिनुभएन र विश्वासको मत लिनुभयो भने संविधानको धारा ७६ को ३ मा जान्छ । उहाँले विश्वासको मत लिएर फेल भयो भने ७६ को ३ मा जाने हो । यहाँसम्म पुग्नु हुँदैन ।’