सरकारबाट ६ जना मन्त्री हटाएर विश्वासको मत लिदैछन् मधेशका मुख्यमन्त्री सिंह

२२ असार, जनकपुर । मधेशका मुख्यमन्त्री सतिशकुमार सिंहले ६ जना मन्त्रीले राजीनामा दिनुपर्ने बताएका छन् । आज राजीनामा नदिने मन्त्रीलाई उनले हटाउने तयारी गरेका छन् । मुख्यमन्त्री सिंहले विश्वासको मत लिने प्रदेशसभा सचिवालयको कार्यसूची छ । 

त्यसअघि उनले मधेश भवनमा आकस्मिक पत्रकार सम्मेलन राखेका छन् । केन्द्रमा सत्ता उलटफेर भएर नेकपा एमाले–नेपाली काँग्रेसको गठबन्धन बनेको छ । जनमत पार्टीका सिंहलाई नै मुख्यमन्त्रीमा निरन्तरता दिन एमाले र काँग्रेसले उनलाई विश्वासको मत दिने भएका छन् । राजीनामा नदिए मधेश सरकारबाट आज चार दलका ६ मन्त्री हटाउँदै छन् ।

नेपाली कांग्रेसलाई सरकारमा सहभागी गराउन मुख्यमन्त्री सतिशकुमार सिंहले माओवादी केन्द्र, एकीकृत समाजवादी, नागरिक उन्मुक्ति पार्टी र नेपाल संघीय समाजवादी पार्टीलाई सरकारबाट हटाउन लागेका हुन् । मुख्यमन्त्री सिंहले चार दलका मन्त्रीहरुलाई राजीनामा बुझाउन आग्रह गरेका छन् ।

२५ जेठमा जनमतका सिंहको नेतृत्वमा बनेको सरकारमा माओवादी केन्द्र अर्थ र उद्योगा वाणिज्य तथा पर्यटन मन्त्राल, एकीकृत समाजवादीले भूमि व्यवस्था कृषि तथा सहकारी मन्त्रालय र ऊर्जा सिँचाइ तथा खानेपानी मन्त्रालय लिएको थियो ।  

माओवादीबाट अर्थमा भरत प्रसाद साह, पर्यटनमा समिर भट्टराई, एकीकृत समाजवादीबाट गोविन्द न्यौपाने कृषि , बेचि लुंगेली श्रम तथा यातायात मन्त्री छन् । यस्तै नेपाल संघीय समाजवादी पार्टीबाट गृहमन्त्री विमला अन्सारी र नागरिक उन्मुक्तिबाट श्रम तथा यातायात मन्त्री उर्मिला देवी सिंह चौधरी छन् । उनीहरुलाई मुख्यमन्त्री सिंहलेले फोन गरेर राजीनामा दिएर मार्ग प्रशस्त गर्ने भनेका छन् ।