एमालेमा अर्थमन्त्री भेटिएन, गृह मन्त्रालय नलिन कांग्रेसमा दवाव

२४ असार, काठमाडौं । सत्ता सहकार्य गर्ने सहमति गर्दा नेकपा एमालेले प्रधानमन्त्रीसहित अर्थ र नेपाली कांग्रेसले गृह मन्त्रालयसहित अरु लिएर सरकार बनाउने सहमति भएको भनिए पनि अहिले आएर यी मन्त्रालय अदलबदल हुने परिस्थिति बन्दै गएको छ । एमाले अध्यक्ष केपी शर्मा ओली प्रधानमन्त्री भएको अवस्थामा गृह मन्त्रालय लिन नहुने मत कांग्रेसमा देखिएको छ । 

ओली प्रधानमन्त्री भएर सरकारको नेतृत्व गरेपछि गृह मन्त्रालय लिएको कांग्रेसले प्रहरी संगठन र मन्त्रालय मातहतका क्षेत्रमा गर्नुपर्ने काम गर्न नसक्ने भन्दै गृहको सट्टा अर्थ मन्त्रालय लिन नेताहरूले सभापति देउवालाई सुझाव दिएका छन् । ओलीको निर्देशन अनुसार चल्नुपर्दा कांग्रेसले प्रहरीका एसएसपी, डीआईजी, एआईजी र आईजीपीसम्म नै भने अनुसार गर्न नसक्ने तर्क उनीहरुको छ । 

भ्रष्टाचारका कतिपय विषयमा पनि भोलि कुरा नमिल्न सक्छ । प्रहरीमै कुरा मिल्दैन । प्रधानमन्त्रीको एउटा चाहना हुनसक्छ । त्यसको दोष कांग्रेसले लिनुपर्छ । यही कारण सत्ता सहयात्रामा असमझदारी पैदा भएर सरकार लामो समयसम्म नजान सक्ने सम्भावना भएकाले सभापति देउवालाई गृहको सट्टा अर्थ मन्त्रालय लिन सुझाव दिइएको कांग्रेसका एक नेताले नेपालबहसलाई बताए । 

उता, एमालेमा पनि अर्थमन्त्री कसलाई बनाउने भन्ने समस्या परेको छ । विष्णु पौडेललाई अर्थमन्त्री बनाउँदा उपप्रधानमन्त्री बनाउनुपर्ने हुन्छ । उपप्रधानमन्त्री नराख्ने दुई दलमा सहमति भएको बताइएको छ । एमालेको एउटा पंक्ति पौडेललाई सरकारमा पठाउन नहुने पक्षमा छ । ओलीले पनि विगतमा जस्तो पौडेललाई प्राथमिकता दिएका छैनन् । कांग्रेससँग सहमति गर्ने काम पनि महासचिव शंकर पोखरेलले गरेका थिए । अन्त्यमा पार्टी भित्र विवाद आउने देखेपछि ओलीले अन्तिममा हस्ताक्षर गर्न भने पौडेललाई पठाएका हुन् । 

सरकार बनाउने सहमति पत्र बनाउने काम भने कांग्रेसबाट रमेश लेखक र एमालेबाट शंकर पोखरेलले गरेका थिए । पोखरेल सांसद नभएकाले मन्त्री बन्न पाउने छैनन् । नत्र उनै अर्थमन्त्री बन्ने थिए । उपप्रधानमन्त्रीको कारण देखाएर पौडेललाई रोकेपछि एमालेबाट पदम गिरी र योगेश भट्टराईमध्ये एक जनालाई अर्थमन्त्री बनाउनुपर्ने अवस्था छ । उनीहरू दुवै अर्थमा नयाँ हुन् । शंकर पोखरेलले भट्टराईलाई च्यापे भने गिरी नभएर उनी नै अर्थमन्त्री बन्न सक्छन् । तर, ओलीले भट्टराईमाथि विश्वास गरिसकेको अवस्था छैन । 

उनीहरु बाहेक एमालेमा अर्थ मन्त्रालय चलाउने खालको सांसद भेटिएको छैन । अहिलेको अर्थतन्त्रको अवस्थालाई हेर्दा अर्थ बुझेको मान्छे पठाउनुपर्ने आवश्यकता छ । कांग्रेसले गृह मन्त्रालय लिएर भने अनुसार काम गर्न नसक्ने र पछि यसैका कारण समीकरणमा खटपट आउने तथा एमालेमा पौडेलबाहेक अर्थमन्त्री बनाउने खालको मान्छ नभएकाले यी मन्त्रालय सट्टापट्टा हुने सम्भावना देखिएको हो ।