धारिलो हतियार प्रयोग गरी विराटनगरमा एक युवकको हत्या, २ जना घाइते

२५ असार, विराटनगर । विराटनगर महानगरपालिका वडा नम्बर २ नेपाल टेलिकम नजिक दुई समूहबीच झडप हुँदा एक जनाको मृत्यु भएको छ । चार जनालाई नियन्त्रणमा लिएर प्रहरीले अहिले अनुसन्धान गरिरहेको छ । घटना सोमबार राति साढे १० बजेतिर भएको प्रहरीको भनाइ छ ।  

झडपको क्रममा छुरा प्रहार हुँदा एक जनाको मृत्यु र दुई जना घाइते भएको जिल्ला प्रहरी कार्यालय मोरङका एसपी नवराज कार्कीले जानकारी दिए । उनका अनुसार छुरा प्रहारबाट तीनै जना घाइते थिए । उद्धार गरी सुरुमा उनीहरूलाई कोशी अस्पताल लगिएको थियो । प्रहरीले अहिलेसम्म यस घटनामा संलग्न रहेको आशंकामा चार जनालाई पक्राउ गरेको छ । उनीहरूमाथि सोधपुछ भइरहेको प्रहरीले जनाएको छ । 

घाइतेमध्ये कटहरी गाउँपालिका–१ जमटोकीका २१ वर्षीय करण कामतको मृत्यु भएको हो । कटहरी–१ जमटोकी कै २२ वर्षीय विक्रम मण्डल र १७ वर्षीय अमन राय घाइते छन् । प्रहरीले भने घाइतेलाई अस्पताल पुर्याएपछि मात्रै घटनाको जानकारी पाएको बताएको छ ।