सरकारले असार २४ सम्ममा १० खर्ब १५ अर्ब ८२ करोड उठायो राजश्व

२५ असार, काठमाडौं । सरकारले चालु आर्थिक वर्षमा १४ खर्ब ७२ अर्ब ४८ करोड राजश्व उठाउने लक्ष्य लिएकोमा सोमबार असार २४ सम्म १० खर्ब १५ अर्ब ८२ राजश्व संकलन भएको छ । २४ गतेसम्म सरकारले राजस्व तथा गैर राजश्व गरी सो बराबरको सुनिश्चित गरेको हो ।  

यो लक्षित राजस्वको ६८.९९ प्रतिशतको हो । समीक्षा अवधिमा राजस्व तर्फबाट ९ खर्ब ८९ अर्ब ९६ करोड ५५ लाख रुपैयाँ संकलन गर्न सकेको छ भने गैर राजस्वबाट १ खर्ब १ अर्ब ४३ करोड २६ लाख संकलन गरेको छ । 

यता अनुदानतर्फ भने सरकारले आर्थिक वर्षका लागि राखेको ४९ अर्ब ९४ करोड ३० लाख रुपैयाँमा जम्मा २ अर्ब ७५ करोड ८० लाख रुपैयाँ (लक्ष्यको ५.५२ प्रतिशत मात्र) लिन सकेको छ ।

यस्तै चालु आर्थिक वर्षको भुक्तानीको अन्तिम दिन सरकारले एकै दिन ३३ अर्ब ६१ करोड रुपैयाँ माथिको भुक्तानी दिएको छ । असार २४ गते राति १२ बजेसम्म सरकारी कार्यालय, विभाग तथा मन्त्रालयहरूले काटेको चेक तथा भुक्तानीमा एकमुस्ट ३३ अर्ब ६१ करोड ३३ लाख रुपैयाँ खर्च भएको हो ।