असारमा अस्वाभाविक निकासा बढाएर कुल बजेटको ७७.४४ प्रतिशत देखायो सरकारले खर्च

२५ असार, काठमाडौं । सरकारले चालू आर्थिक वर्षमा साढे ७७ प्रतिशत खर्च भएको देखाएको छ । सोमबार रातिसम्म १३ खर्ब ५६ खर्ब रुपैयाँ खर्च भएको हो । चालू खर्च ९ खर्ब ३३ अर्ब छ भने पूँजीगत खर्च १ खर्ब ७२ अर्ब रुपैयाँ पुगेको छ । जुन विनियोजित बजेटको करिब ५७ प्रतिशत हो । 

वित्तीय व्यवस्थामा ३ खर्ब ७ अर्ब रुपैयाँ छुट्याएकोमा २ खर्ब ५० अर्ब रुपैयाँ खर्च भएको महालेखा परीक्षकको कार्यालयले जनाएको छ । राजस्व संकलन ६९.५९ प्रतिशत भएको छ । राजस्वतर्फ ८ खर्ब ८८ अर्ब रुपैयाँ संकलन हुँदा गैरकर राजस्व १ खर्ब १ अर्ब रुपैयाँ संकलन भएको छ ।

अनुदान भने २ अर्ब ७५ करोड रुपैयाँ प्राप्त भएको महालेखा परीक्षकको कार्यालयले जनाएको छ । सरकारले अन्य आम्दानीको रुपमा २३ अर्ब ९ करोड प्राप्त गरेको छ । महालेखा नियन्त्रक कार्यालयका अनुसार भुक्तानीको अन्तिम २ दिनमै करिब ५८ अर्ब रुपैयाँ निकासा भएको छ ।

आइतबार सरकारले २४ अर्ब २७ करोड खर्च गरेकोमा सोमबार ३३ अर्ब ६१ करोड रुपैयाँ खर्च भएको जनाएको छ । आइतबार १२ अर्ब ५१ करोड वित्तीय व्यवस्थाको लागि खर्च हुँदा चालू खर्चको लागि ८ अर्ब र पुँजीगत खर्चको लागि ३ अर्ब ७० करोड रुपैयाँ खर्च भएको छ । 

सोमबार १४ अर्ब रुपैयाँ पुँजीगत खर्च हुँदा चालू खर्च ९ अर्ब ८५ करोड र वित्तीय व्यवस्थाका लागि ९ अर्ब ३५ करोड खर्च गरेको छ । असारमा बजेट सक्नका लागि धेरै खर्च देखाइने प्रचलन छ । जेठसम्मका महिनामा सरकारको खासै खर्च हुँदैन । तर, एक महिनामा बजेट हतारमा खर्चिएर सक्ने चलन छ ।