ओली नेतृत्वमा बन्ने सरकार संविधानको धारा ७६ (२) अनुसार नै गठन हुन्छः शेखर कोइराला

२५ असार, काठमाडौं । नेपाली कांग्रेसका वरिष्ठ नेता डा. शेखर कोइरालाले नेकपा एमालेका अध्यक्ष केपी शर्मा ओली नेतृत्वमा बन्न गइरहेको नयाँ सरकार संविधानको धारा ७६ को उपधारा २ अनुसार नै गठन हुने बताएका छन् । काठमाडौंमा मंगलबार आयोजित एक कार्यक्रमलाई सम्बोधन गर्दै उनले अबको सरकार धारा ७६ को ३ जाने अवस्था नरहेको बताए । 

कांग्रेस र एमाले मिलेर देशलाई स्थायित्व दिनुपर्छ भनेर आफूले उठाएको मुद्दाले अहिले आएर सार्थकता पाएको बताए । उनले मिडियाहरूमा संविधानको धारा ७६ को २ अनुसार सरकार हुन्छ कि ३ अनुसार भन्ने कुरा आइरहेको भन्दै उनले यसमा अलमल हुने काम नरहेको र अब बन्ने सरकार ७६ (२) कै सरकार हुने दावी गरे । 

कांग्रेस र एमाले मिलेर आलोपालो सरकारको नेतृत्व गरेर जाने कुरा गरेको छौं र २८ गते प्रधानमन्त्रीले विश्वासको मत लिन्छु भन्नुभएको छ । उहाँलाई संविधानले दिएको अधिकार हो, उनले भने ‘मैले त सात आठ महिनाअघि देखिनै कांग्रेस एमाले मिल्नुपर्छ भन्दै आइरहेको थिएँ । देशमा अस्थिरता निम्तिएको छ, सरकार चेन्ज भएको भइरहेको छ । यसलाई रोक्नुपर्छ ।’

मिडियाहरू संविधानको धारा ७६ को २ अनुसार सरकार हुन्छ कि ३ अनुसार भन्ने अलमल देखिएको भन्दै उनले यसमा अलमल हुने ठाउँ नभएको बताए । अब बन्ने सरकार ७६ (२) कै सरकार हुन्छ । यहाँ धेरै मिडियाहरूले मजा लागेको हो वा के हो मैले बुझ्न सकेको छैन । तर अब बन्ने सरकार संविधानको धारा ७६ को उपधारा २ कै हुन्छ, उनले भने ।