झलनाथ खनालको सर्प पालनमा भ्रष्टाचार : पूर्व अर्थमन्त्री यादवलाई ९ वर्ष कैद, ३ करोड बढी जरिवाना

२५ असार, काठमाडौं । पूर्व प्रधानमन्त्री झलनाथ खनालको नाममा स्थापित स्वास्थ्य विज्ञान प्रतिष्ठानको भ्रष्टाचार प्रकरणमा मधेश प्रदेशका पूर्व अर्थमन्त्री विजयकुमार यादवसहित ५ जनालाई कैद तथा जरिवाना तोकेको छ ।

जसअनुसार पूर्वमन्त्री यादवलाई ९ वर्ष एक महिना जेल र ३ करोड ५९ लाख ६६ हजार ६ सय जरिवाना तोकिएको छ । साथै उनीबाट दुई करोड ३५ लाख २९ हजार ३८६ असुल गर्न पनि विशेष अदालतले आदेश दिएको छ ।  

त्यसैगरी प्रतिष्ठानका अध्यक्ष रेवतीप्रसाद पन्त, महासचिव नवराज भण्डारी, कोषाध्यक्ष नीरज भण्डारी, देवेन्द्र राईलाई जनही ८/८ वर्ष कैद सजाय हुने फैसला भएको छ । लालबन्दी नगरपालिकाका तत्कालीन प्रमुख मानबहादुर खड्का र मधेश सरकारका तत्कालीन सचिव प्रेमकुमार श्रेष्ठले भने सफाइ पाएका छन्‌ ।

गत असार ११ गते विशेष अदालतका अध्यक्ष टेकनारायण कुँवर, तेजनारायणसिंह राई र मुरारीबाबु श्रेष्ठको इजलासले ५ जनालाई दोषी ठहर गर्दै सजाय निर्धारणका लागि असार २५ मा पेसी तोकेको थियो ।

अख्तियारले प्रतिष्ठानको नाममा सरकारबाट १७ करोड ९८ लाख ३३ हजार रुपैयाँ खर्च भइसक्दासमेत कामको प्रगति शून्य देखिएपछि ७ जनाविरुद्ध २०८० असोज २१ गते मुद्दा दायर गरेको थियो ।