स्वर्ग लान्छु भनेर ओलीले नर्क पुर्याए, धोका दिए: प्रचण्ड

२६ असार, काठमाडौं । नेकपा माओवादीका अध्यक्ष एवं प्रधानमन्त्री पुष्पकमल दाहाल प्रचण्डले नेकपा एमालेका अध्यक्ष केपी शर्मा ओलीले आफूलाई धोका दिएर नर्कमा पुर्याएको बताएका छन् । स्वर्ग पुर्याउँछु भनेपछि कांग्रेस छोडेर एमालेसँग सहकार्य गर्दा ओलीले यो अवस्थामा पुर्याएको उनको भनाइ छ ।  

बुधबार सिंहदरवारमा बसेको माओवादी संसदीय दलको बैठकलाई सम्बोधन गर्दै प्रचण्डले स्वर्ग गए पनि नर्क गए पनि सँगै जाने कसम खाएको केही समयमै ओलीले धोका दिएको बताए । कम्युनिष्ट पार्टीबीचको सहकार्य उचित हुने ठानेर ओलीसँग सहकार्य गरेको बताए । 

ओलीले धोका दिएको बताउँदै माओवादीले विश्वासको मत प्राप्त नगरे विपक्षमा रहेर जनताको आवाज मुखरित गर्ने बताए । राजीनामा दिएर नभाग्ने भन्दै संसदको फेस गर्ने अधिकार प्रधानमन्त्रीमा रहेकाले फेस गर्ने बताएका उनले अन्य राजनीतिक दललाई पनि प्रधानमन्त्रीको पक्षमा मतदान गर्न अनुरोध गरेका थिए । 

प्रधानमन्त्री प्रचण्डले शुक्रबार संसदमा विश्वासको मत फेस गर्ने छन् । माओवादी संसदीय दलको बैठकले पनि विश्वासको मत लिने निर्णय गरेको छ । प्रधानमन्त्री प्रचण्डले एमालेसँग किन सहकार्य गरियो भन्ने विषयमा बैठकमा ब्रिफिङ गरेका थिए ।