विश्वासको मत लिनुअघि मन्त्रिपरिषदलाई बाई भन्दै प्रधानमन्त्री

२७ असार, काठमाडौं । सम्भवतः आफ्नो नेतृत्वको अन्तिम बैठक हुनसक्ने भन्दै प्रधानमन्त्री पुष्पकमल दाहाल प्रचण्डले बिहीबार ४ बजे बस्ने गरी मन्त्रिपरिषदको बैठक बोलाएका छन् । उनको मन्त्रिपरिषदबाट एमालेका मन्त्रीहरू बाहिरिसकेका छन् । भोलि शुक्रबार उनले संसदबाट विश्वासको मत लिँदैछन् । 

नेपाली कांग्रेस र नेकपा एमालेले उनलाई विश्वासको मत नदिने भन्दै आफ्ना सांसदहरूलाई विपक्षमा मतदान गर्न ह्वीप नै लगाएका छन् । उनले शुक्रबार विश्वासको मत नपाएपछि नयाँ सरकार गठनको प्रक्रिया भोलिबाटै सुरु हुनेछ । आजको बैठकका एजेण्डाबारे केही जानकारी गराइएको छैन । यद्यपि सरकार अल्पमतमा रहेकाले कुनै ठूला निर्णय गर्न नमिल्ने अवस्था पनि छ । 

२०७९ साल पुस ११ गते प्रधानमन्त्री बनेका प्रचण्ड नेतृत्वको सरकार अल्पमतमा परेसँगै शुक्रबार संसदबाट विश्वासको मत लिएपछि उनी बाहिरँदैछन् । अहिलेसम्मको अवस्थामा प्रधानमन्त्रीले यो पटक विश्वासको मत गमाउनेछन् । नेपाली कांग्रेस र एमालेबीच नयाँ सत्ता समीकरण गर्ने समझदारी भएसँगै असार २८ पछि एमाले अध्यक्ष केपी शर्मा ओली प्रधानमन्त्री बन्ने तयारी छ ।