संसदमा अनिवार्य उपस्थित भएर प्रधानमन्त्रीका विपक्षमा मतदान गर्न कांग्रेसका सांसदलाई दलको निर्देशन

२७ असार, काठमाडौं । काठमाडौँ । नेपाली कांग्रेसले पार्टीका सांसदहरूलाई शुक्रबारको संसद बैठकमा अनिवार्य उपस्थित भएर प्रधानमन्त्री प्रचण्डको विपक्षमा मतदान गर्न ह्विप जारी गरेको छ । कांग्रेसका प्रमुख सचेतक रमेश  लेखक बिहीबार ह्वीप जारी गरेका हुन् । 

शुक्रबार प्रधानमन्त्री प्रचण्डले संसदबाट विश्वासको मत लिन लागेको सन्दर्भमा कांग्रेस संसदीय दलले सांसदहरुलाई बैठकमा अनिवार्य उपस्थित हुन, तटस्थ नरहन र विश्वासको मतको विपक्षमा मतदान गर्न भनेको हो । प्रमुख सचेतक रमेश लेखकले ह्विप जारी गर्दै विश्वास मत नदिन भनेका छन् ।

असार २८ गते बिहान ११ बजे बस्ने प्रतिनिधि सभा बैठकमा कांग्रेसका सदस्यहरुलाई अनिवार्य उपस्थित हुन, तटस्थ नरहन र प्रधानमन्त्री पुष्पकमल दाहाल प्रचण्डले आफूमाथि प्रतिनिधि सभाको विश्वास छ भन्ने प्रस्तावको विपक्षमा मतदान गर्न ह्विप जारी गर्नुभएको छ,’ कांग्रेस संसदीय दलले जारी गरेको विज्ञप्तिमा उल्लेख छ । 

कांग्रेस र एमालेबीत गत असार १७ गते नयाँ समीकरण बनाएर सरकार गठनको सहमति भएको थियो। प्रधानमन्त्रीले राखेको विश्वास मतको प्रक्रिया सकिएपछि नयाँ सरकार गठन प्रक्रिया सुरू हुनेछ । कांग्रेस र एमालेबीच भएको सहमतिअनुसार पहिलो दुई वर्ष एमाले अध्यक्ष केपी शर्मा ओली र पछिल्लो डेढ वर्ष कांग्रेस सभापति शेरबहादुर देउवा प्रधानमन्त्री बन्नेछन् ।