कार्यसूचीका विधेयक पेश गर्ने मन्त्री नभएर राष्ट्रिय सभा बैठक स्थगित, विपक्षी दलले जनाए आपत्ति

२७ असार, काठमाडौं । बैठकमा विधेयक प्रस्तुत गर्ने मन्त्री नै नभएपछि बिहीबारको राष्ट्रिय सभाको बैठक विशेष कारणवस भन्दै सूचना टाँस गरेर स्थगन गरिएको छ । आज प्स्तुत भएका विधेयक पास गरेर प्रतिनिधि सभामा पठाउन सवा १ बजे बैठक बोलाइएको थियो । 

राष्ट्रिय सभा नियमावलीको नियम ६ को उपनियम ५ मा बैठकमा सरकारका मन्त्रीको उपस्थिति अनिवार्य रूपमा हुनुपर्ने र कुनै मन्त्रालयसँग सम्बन्धित विषयमा छलफल हुँदाको अवस्थामा सम्बन्धित मन्त्रीसमेत उपस्थित हुनुपर्ने व्यवस्था छ । तर, छोड्ने बेला भएको भन्दै मन्त्री उपस्थित नहुने जानकारी गराइयो । 

बैठक स्थगित भएको विज्ञप्ति जारी गर्दै संसदका महासचिव पदमप्रसाद पाण्डेयले राष्ट्रियसभाको बैठक विशेष कारणवश तोकिएको दिन र समयमा बस्न नसक्ने भएकोले राष्ट्रियसभा नियमावली, २०७५ को नियम ६ को उपनियम ३ बमोजिम सम्माननीय अध्यक्षले मिति २०८१ असार ३० गते आइतबार अपराह्न १ः१५ बजे बस्ने गरी निर्धारण गरिएको व्यहोरा जानकारी गराएका छन् । 

आजको बैठकमा आर्थिक विधेयक, राष्ट्र ऋण उठाउने विधेयकमाथि छलफल गरी पारित गर्ने तयारी रहेको थियो । भन्सार महसुल विधेयक प्रतिनिधिसभामा पठाउने प्रस्ताव प्रस्तुत गर्ने लगायतका सम्भावित कार्यसूची रहेका थिए । तर, सरकारका कुनै पनि मन्त्री बैठकमा उपस्थित नभएपछि बैठक स्थगित भयो । सदनमा प्रस्तुत गरिने विधेयकसम्बन्धी मन्त्री नआउने भएपछि राष्ट्रिय सभाका अध्यक्ष नारायणप्रसाद दाहालले सूचना टाँस गर्न लगाएका थिए । 

आजको बैठकको सुरुमा अध्यक्ष दाहालले राष्ट्रपतिको कार्यालयबाट प्राप्त विधेयक प्रमाणीकरणसम्बन्धी र मन्त्रिपरिषद् सदस्यको कार्यभार तोकिएको सम्बन्धी पत्रहरूको व्यहोरा जानकारी गराउने कार्यसूची थियो । अर्थमन्त्री वर्षमान पुनले प्रतिनिधि सभाबाट सन्देशसहित प्राप्त आर्थिक विधेयक, २०८१ माथिको दफावार छलफल सदनमा गरियोस् भन्ने प्रस्ताव प्रस्तुत गर्ने पनि कार्यसूचीमा उल्लेख थियो ।

त्यसपछि आर्थिक विधेयक पारित गरी प्रतिनिधि सभामा फिर्ता पठाउने तालिका थियो । राष्ट्र ऋण उठाउने विधेयक, २०८१ माथिको दफावार छलफल सदनमा गरियोस् भन्ने प्रस्ताव प्रस्तुत गर्ने र उक्त विधेयक पारित गरेर प्रतिनिधि सभामा फिर्ता पठाउने कार्यसूची यसअघि नै तय गरिएको थियो ।

भन्सार महसुल विधेयक, २०८१ माथिको दफावार छलफल सदनमा गरियोस् भन्ने प्रस्ताव प्रस्तुत र पारित गर्ने कार्यसूची पनि आजै तोकिएको थियो । बजेटसँग सम्बन्धित यी सबै विधेयक प्रतिनिधि सभाबाट पारित भइसकेका छन् । अभिलेख संरक्षण (पहिलो संशोधन) विधेयक, २०७७ का सम्बन्धमा प्रतिनिधि सभाबाट भएको संशोधनमाथि छलफल गरियोस् भन्ने प्रस्ताव प्रस्तुत गर्ने निर्धारित तालिका पनि प्रभावित भयो । 

अर्थमन्त्रीले बजेटमा ल्याएका प्रावधानहरूमाथि संशोधन पास गर्ने तयारीमा रहेका कांग्रेस–एमालेले भने आपत्ति जनाएका छन् । बैठक स्थगित गर्ने राष्ट्रिय सभाका अध्यक्षको कदम गलत भएको भन्दै कांग्रेस, एमाले, जसपा र लोसपाले आपत्ति जनाएका हुन् । 

बैठकमा अर्थमन्त्रीको अनुपस्थिति भन्दै राष्ट्रिय सभाको अध्यक्षले राष्ट्रिय सभामा प्रतिनिधित्व गर्ने चार दलको असहमतिका बाबजूद बैठक स्थगित गरेका थिए । एमालेकी प्रमुख सचेतक भवगती न्यौपाने, कांग्रेसका प्रमुख सचेतक कृष्णबहादुर रोकाय, जनता समाजवादी पार्टी दलका नेता मृगेन्द्रकुमार सिंह र लोसपा दलका नेता शेखरकुमार सिंहले विज्ञप्ति जारी गर्दै राष्ट्रिय सभाले विद्येयकहरुमा आफ्नो सुझाव र संशोधन राख्न पाउने संवैधानिक र कानूनी अधिकार समेत हनन भएको उल्लेख गरेका छन् ।