भक्तपुरमा चार दिने खेलकुद सप्‍ताह सुरु

२७ असार, भक्तपुर । नेपाल इन्जिनियरिङ कलेज (नेक) दुवाकोट चाँगुनारायण भक्तपुरको आयोजनामा बिहीबारदेखि खेलकुद सप्‍ताह २०८१ सुरु भएको छ । सप्‍ताहमा कलेजमा स्नातक तह वीई तथा विआर्कमा अध्ययनरत झण्डै दुई हजार विद्यार्थी संलग्न भएको बताइएको छ । 

सप्‍ताहको उद्घाटन कलेजकै कार्यबाहक प्रचार्य दुर्गाप्रसाद भण्डारीले एक समारोहबीच गरे । उद्घाटन कार्यक्रममा वक्ता कलेजका विभिन्न पदाधिकारीहरूले खेलकुद सप्‍ताहका विविध विषयहरूमाथि चर्चा गरेका थिए । 

खेलकुद सप्‍ताह अन्तर्गत फुटबल, भलिबल, कवर्डी, बास्केटबल, ब्याडमिन्टन, चेस, क्यारेम, इगेमिंग, टेबल टेनिस, सट जम्प, लंग जम्प, हाइ जम्प, म्यूजिकल चेयर्स, वाकिंग रेस, डोरी तान्ने खेल, म्याराथुन, लगायतका झण्डै दुई दर्जन प्रतियोगिताहरू चल्ने कलेजको विद्यार्थी कल्याण शाखाका संयोजक एसोसिएट प्रोफेसर विष्णुप्रसाद भण्डारीले जनाए । बताइए अनुसार प्रतियोगितामा कलेजको स्नातक तह विई तथा विआर्क तहमा अध्ययनरत झण्डै सबै विद्यार्थी सहभागी छन् ।

प्रतियोगितामा उत्कृष्ट विद्यार्थीहरूलाई मेडल तथा प्रमाणपत्र पनि वितरण गरिने जनाइएको छ । कलेजले जनाए अनुसार प्रतियोगिताको फाइनल सकेपछि उनीहरुलाई दैनिक रुपमा मेडल तथा प्रमाणपत्र वितरण हुनेछ ।जुनजुन प्रतियोगिता सकिंदै जान्छ, त्यो त्यो प्रतियोगितामा उत्कृष्ट विद्यार्थीलाई प्रतियोगिता सकेपछि मेडल तथा प्रमाणपत्र वितरण गरिने जनाइएको छ । प्रतियोगिता असार ३० गतेसम्म चल्ने जनाइएको छ ।