आठ दल प्रधानमन्त्रीको विपक्षमा, विश्वासको मत नदिने

२७ असार, काठमाडौं । असार २८ गते विश्वासको मत लिने तयारी गरिरहेका प्रधानमन्त्री पुष्पकमल दाहाल प्रचण्डको मत एकपछि अर्को गर्दै घटिरहेको छ । अहिलेसम्म आठ राजनीतिक दलले उनलाई नदिने निर्णय गरिसकेका छ । राष्ट्रिय प्रजातन्त्र पार्टी (राप्रपा) ले पनि प्रधानमन्त्री पुष्पकमल दाहाल प्रचण्डलाई विश्वासको मत नदिने भएको छ ।

बिहीबार बसेको संसदीय दलको बैठकले प्रधानमन्त्रीले मागेको विश्वासको मतको विपक्षीमा मत दिने निर्णय गरेको सांसद धवलशमशेर राणाले जानकारी दिए । जनमत पार्टीले पनि प्रधानमन्त्री प्रचण्डलाई विश्वासको मत नदिने निर्णय गरेको छ । बिहीबार बसेको पार्टी बैठकले भोलि प्रधानमन्त्री प्रचण्डलाई विश्वासको मत नदिने निर्णय गरेको हो ।

नेपाली कांग्रेस, नेकपा एमाले, उपेन्द्र यादव नेतृत्वको जसपा नेपाल, अशोक राई नेतृत्वको जसपा, तराई मधेश लोकतान्त्रिक पार्टी (लोसपा), नाउपा, जनमत र राप्रपाले प्रधानमन्त्रीलाई विश्वासको मत नदिने निर्णय गरेका छन् । कांग्रेस र एमालेको समर्थनमा मधेशमा सरकार बनेकाले जनमतले केन्द्रमा नयाँ गठबन्धनलाई नै साथ दिने निर्णय गरेको हो ।

राष्ट्रिय स्वतन्त्र पार्टी, नेकपा एकीकृत समाजवादी र माओवादी मात्र उनको पक्षमा मतदान गर्ने पक्षमा छन । जनमोर्चा नेपाल, नेपाल मजदुर किसान पार्टी र स्वतन्त्र सांसदको भने कुनै निर्णय आएको छैन् । कांग्रेस र एमाले मिलेर सरकार बनाउने सहमति गरेपछि अल्पमतमा परेका प्रधानमन्त्रीले विश्वासको मत लिन लागेका हुन् । प्रधानमन्त्री प्रचण्डले भोलि शुक्रबार संसदमा विश्वासको मत माग्ने कार्यसूची छ ।