वित्तीय संस्थाको कुल मुनाफा ६१ अर्ब ९५ करोड, वाणिज्य बैंकले मात्र कमाए साढे ५६ अर्ब

२८ असार, काठमाडौं । नेपाल राष्ट्र बैंकले वाणिज्य बैंकहरुले चालू आर्थिक वर्षको ११ महीनामा साढे ५६ अर्ब मुनाफा आर्जन गरेको जनाएको छ । राष्ट्र बैंकका अनुसार चालु आवको जेठसम्ममा २० वाणिज्य बैंकले ५६ अर्ब ४५ करोड ५ लाख ४० हजार रुपैयाँ कुल मुनाफा आर्जन गरेका छन् । यस अवधिमा बैंक तथा वित्तीय संस्थाले ६१ अर्ब ९५ करोड बराबरको मुनाफा गरेका छन् ।

जसमध्ये वाणिज्य बैंकको मुनाफा ५६ अर्ब ४५ करोड रहँदा विकास बैंकले ४ अर्ब ९५ करोड र वित्त कम्पनीले ५५ करोड मुनाफा कमाएका छन् । वाणिज्य बैंकहरुले गत आर्थिक वर्षमा ७० अर्ब ४ करोड खुद मुनाफा गरेका थिए । उनीहरुले ११ महिनामा ६७ अर्ब २३ करोड मुनाफा गरेका थिए । गत आवको ११ महिनाको मुनाफाको तुलनामा चालु आवको सोही अवधिमा गरेको मुनाफा १६ प्रतिशत कम हो ।

यसअनुसार सिटिजन बैंकले चालु आर्थिक वर्षको जेठसम्म १ अर्ब ७५ करोड ६७ लाख मुनाफा आर्जन गरेको छ । सानिमा बैंकले १ अर्ब ७४ करोड ६४ लाख मुनाफा कमाएको छ । कुमारी बैंकको मुनाफा १ अर्ब ६७ करोड ४५ लाख रहेको छ भने नेपाल एसाबआई बैंकले १ अर्ब ६६ करोड ५१ लाख, माछापुच्छ्रे बैंकले १ अर्ब २८ करोड ४२ लाख र नेपाल बैंकले सबैभन्दा कम १ अर्ब ७ करोड ६३ लाख मुनाफा आर्जन गरेको छ ।

नेपाल इन्भेष्टमेन्ट मेगा बैंकले ४ अर्ब ३८ करोड १३ लाख, प्राइम कमर्सियल बैंकले ३ अर्ब ५५ करोड ५१ लाख र एभरेष्ट बैंकले ३ अर्ब ३१ करोड ३१ लाख मुनाफा आर्जन गरेका छन् । सरकारी स्वामित्वका राष्ट्रिय वाणिज्य बैंकले यस अवधिमा ३ अर्ब ६ करोड ८३ लाख, प्रभु बैंकले ३ अर्ब ३ करोड ४२ लाख, कृषि विकास बैंकले ३ अर्ब २ करोड ४८ लाख र स्ट्याण्डर्ड चार्टर्ड बैंकले ३ अर्ब १ करोड ९० लाख मुनाफा कमाएका छन् । यस आधारमा ९ ओटा वाणिज्य बैंकले ३ अर्बभन्दा बढी नाफाआर्जन गरेका छन् ।

एनएमबि बैंकले जेठ मसान्तसम्म २ अर्ब ७७ करोड ६३ लाख मुनाफा आर्जन गर्दा हिमालयन बैंकले २ अर्ब ७६ करोड ६० लाख, लक्ष्मी सनराइज बैंकले २ अर्ब ३७ करोड ४३ लाख, सिद्धार्थ बैंकले २ अर्ब २७ करोड २ लाख र एनआईसी एशिया बैंकले २ अर्ब २३ करोड ५३ लाख मुनाफा आर्जन गरेका छन् । यसरी साउनदेखि जेठ मसान्तसम्ममा ६ ओटा वाणिज्य बैंकको नाफा दुई अर्बभन्दा कम रहेको छ । 

चालू आवको जेठ मसान्तसम्म नबिल बैंक नाफा आर्जन गर्नेमा सबैभन्दा अगाडि छ । नबिल बैंकले ११ महीनामा ६ अर्ब ३३ करोड ८४ लाख रुपैयाँ खुद नाफा आर्जन गरेको छ भने दोस्रो स्थानमा रहेको ग्लोबल आईएमई बैंकले ५ अर्ब ९ करोड ३ लाख रुपैयाँ आर्जन गरेको छ ।