प्रधानमन्त्री गए शीतलनिवास, कानुनी परामर्शमा राष्ट्रपति

२८ असार, काठमाडौं । प्रतिनिधि सभाबाट प्रधानमन्त्री पुष्पकमल दाहाल प्रचण्ड राष्ट्रपति कार्यालय गएका छन् । उनी विश्वासको मत नपाएको विषयमा जानकारी गराउन राष्ट्रपति कार्यालय शीतलनिवास गएका हुन् ।  प्रधानमन्त्रीले विश्वासको मत नपाएपछि राष्ट्रपतिले कानुनी परामर्श सुरु गरेका छन् । 

सरकार गठनको आह्वानअघि राष्ट्रपति रामचन्द्र पौडेलले कानुनविद्लाई छलफलमा बोलाएको राष्ट्रपति कार्यालयले जनाएको छ । उनले वरिष्ठ अधिवक्ता, संविधानविद्लगायतलाई छलफलमा बोलाएका हुन् । नयाँ सरकार गठनका लागि कुन धाराको प्रयोग गर्ने भन्ने विषयमै राष्ट्रपतिले परामर्श गर्न चाहेका हुन् । 

प्रतिनिधिसभाबाट प्रधानमन्त्री प्रचण्डले विश्वासको मत नपाउने निश्चित भएसँगै राष्ट्रपतिले नयाँ सरकार गठनका लागि आह्वान गर्नुपर्ने हुन्छ । तर, कुन धारा अनुसार गर्ने भन्नेबारे स्पष्ट हुन राष्ट्रपतिले कानुनविद्लाई बोलाएको शीतल निवास स्रोतको भनाइ छ ।

संसद्ले प्रधानमन्त्री प्रचण्डले विश्वासको मत गुमाएको पत्र केही बेरमै राष्ट्रपति कार्यालयमा पुर्याउने छ । पत्र पुगेसँगै राष्ट्रपति रामचन्द्र पौडेलले सरकार गठनका लागि आह्वान गर्नेछन् । राष्ट्रपतिबाट आह्वान भएपछि आजै दाबी प्रस्तुत गर्ने तयारी रहेको बताइएको छ ।