प्रधानमन्त्री पदमुक्त भएपछि नयाँ सरकार गठनबारे कांग्रेस र एमालेले थाले छलफल

२८ असार, काठमाडौं । प्रधानमन्त्री पुष्पकमल दाहाल प्रचण्डले विश्वासको मत नपाएर पदमुक्त भएसँगै  नयाँ सरकार गठनका लागि नेपाली कांग्रेस र नेकपा एमालेले छलफल थालेका छन् । नयाँ बानेश्वरस्थित संसद् भवनको एमाले अध्यक्ष केपी शर्मा ओलीको कार्यकक्षमा कांग्रेस र एमालेका नेताहरूबीच छलफल चलिरहेको छ । 

प्रतिनिधिसभाको शुक्रबारको बैठकबाट विश्वासको मत नपाएर पुष्पकमल दाहाल प्रचण्डको सरकार ढलेपछि कांग्रेस र एमालेबीच नयाँ सरकार गठनका लागि संवाद सुरु भएको हो । एमाले अध्यक्ष ओलीको नेतृत्वमा नयाँ सरकार गठनका लागि असार १७ मै कांग्रेस र एमालेबीच सहमति भएको थियो । 
 
संघीय संसद् सचिवालयले प्रधानमन्त्री पद रिक्त भएको सूचना राष्ट्रपति कार्यालय पठाएपछि राष्ट्रपति कार्यालयबाट नयाँ सरकार गठनको लागि प्रक्रिया सुरु हुनेछ । संसद् सचिवालयबाट प्रधानमन्त्री प्रचण्डले संसद्मा विश्वासको मत गुमाएको र पद रिक्त रहेको जानकारी बारेको पत्र  राष्ट्रपति कार्यालयमा पठाइसकेको छ । 
 
विश्वासको मत लिने क्रममा प्रधानमन्त्री प्रचण्डको पक्षमा ६३ मत, विपक्षमा १९४ मत र १ मत तटस्थमा परेको थियो । सो मत नपाएसँगै प्रचण्ड नेतृत्वको सरकार ढलेको छ ।  १८ महिनाको अवधिमा उनले पाँचौंपटक विश्वासको मत लिए ।  अब नयाँ सरकार गठनका लागि राष्ट्रपतिले आह्वान गर्नेछन् ।