भुक्तानी नपाएको भन्दै निर्माण व्यवसायीहरुद्वारा सडक पुर्वाधार विकास कार्यालयमा तालाबन्दी

२८ असार, बर्दिया । काम सम्पन्न भएपनि भुक्तानी नपाएको भन्दै बर्दियाका निर्माण व्यवसायीहरूले सडक पूर्वाधार विकास कार्यालयमा तालाबन्दी गरेका छन । बर्दियाका निर्माण व्यवसायीहरूले काम सम्पन्न गरिसके पनि करिब ८ करोड भन्दा बढि रुपैया भुक्तानी पाउन नसकेको बताएका छन् ।

प्रदेश सरकारले असार २४ गते राति १२ बजे खाता बन्द गर्नुपर्नेमा २२ गते साँझ ६ बजे बन्द गरेको कारण काम भएपनि भुक्तानी दिन नसकिएको सडक पूर्वाधार विकास कार्यालय, बर्दियाका प्रमुख गोविन्द बहादुर महत्रा क्षेत्रीले बताए । प्रदेश सरकारले रकम नपठाएका कारण यस्तो समस्या भएको उनले बताए ।

निर्माण व्यवसायी संघ, बर्दियाका वरिष्ठ उपाध्यक्ष विमल केसीको नेतृत्वमा कार्यालयमा ताला लगाइएको निर्माण व्यवसायी संघ बर्दियाका सचिव जगदीश आचार्यले बताए ।  ‘व्यवसायीले बैँकबाट ऋण लिएर सरकारको काम गरेको छ तर काम सम्पन्न गरेको भुक्तानी नपाउँदा आफुहरु सडकमा पुग्ने अवस्था आएको आचार्यले बताए ।

सडक पूर्वाधार विकास कार्यालय बर्दियाका सूचना अधिकारी देवेन्द्र सिंह मालका अनुसार कार्यालयमा ताला लागेका कारण काम काज खासै नभएपनि प्रभावित बनेको बताए । निर्माण व्यवसायी संघ लुम्बिनी प्रदेशका महासचिव भरत पौडेलले निर्माण व्यवसायी यस्तो कार्यले मर्कामा परेको बताए । उनका अनुसार लुम्बिनी प्रदेशमा झन्डै  ३ अर्ब रुपैया भुक्तानी रोकिएको छ ।

यस विषयमा लुम्बिनी प्रदेश सचिव एवं प्रवक्ता निराजन घिमिरेले संघीय सरकारबाट आउनु पर्ने रकम नआएका कारण निर्माण व्यवसायीलाई काम सम्पन्न गरे पनि भुक्तानी दिन नसकिएको बताए । उनका अनुसार झन्डै ३ अर्ब रुपैया प्रदेश सम्पन्न भएका निर्माण कार्यको भुक्तानी दिन बाँकी रहेको छ ।