सिमलताल पहिरो अपडेट : हराएका बस र यात्रु खोज्न वाटर ड्रोन र क्यामेरा प्रयोग

२९ असार, चितवन । नारायणगढ–मुग्लिन सडकखण्डको समलतालबाट त्रिशूली नदीमा खसेका दुई बसको यात्रुको खोजीमा पानीभित्र प्रयोग गरी खोज्न सकिने सोनार क्यामरा र वाटर ड्रोनको प्रयोग गरिएको छ । शनिबार बिहानबाट सशस्त्र प्रहरी बालका गोताखोरहरुले वाटर ड्रोन, सोनार क्यामेरा र पाइपलाइन इन्सपेक्सन सिस्टमसहित खोजीकार्य सुरु गरेको हो ।

पाइपलाइन इन्फेक्सन मार्फत सोनार क्यामेराको प्रयोग गरेर खोजी कार्य थालिएको सशस्त्र प्रहरी बलले जनाएको छ ।   बस खोज्न सशस्त्र प्रहरी बलका ९ जना गोताखोर सहितको टिम परिचालन गरिएको छ । नेपाली सेनाका सहित २८ जना गोताखोर परिचालन गरिएको गृह मन्त्रालयले जनाएको छ । 

शुक्रबार बिहान ३ बजेर ३० मिनेटमा त्रिशूलीमा दुई वटा डिलक्स बस खसेका थिए । काठमाडौँबाट गौर जाँदै गरेको बागमती प्रदेश–०३–००१ ख २४९५ नम्बरको गणपति डिलक्स र एन्जल वीरगन्जबाट काठमाडौँतर्फ आउँदै गरेको बागमती प्रदेश–०३–००६ ख १५१६ नम्बरको एन्जल डिलक्स नदीमा खसेका हुन् । तर, शुक्रवार १५ घण्टा खोजी गर्दा पनि बस र यात्रुको अवस्था पत्ता लागेको छैन । दुईवटा बसमा सवार कम्तीमा ५५ यात्रुको अवस्था अज्ञात छ ।