गोताखोरले नदीको २० मिटर तलसम्म खोज्दा पनि फेला पार्न सकिएको छैन बगेका बस र यात्रु

२९ असार, चितवन । शुक्रबार बिहान त्रिशुली नदीमा खसेको बस र त्यसमा सवार यात्रुहरूको खोजी कार्य शनिबार पनि जारी छ । बिहान ८ बजेपछि खोजीकार्य सुरू भएपछि अहिलेसम्म केही भेटिएको छ । पानीको १५-२० मिटर गहिराइमा गएर खोज्दा पनि बस पत्ता लगाउन नसकिएको त्यहाँ उपस्थित सुरक्षाकर्मीले जानकारी दिएका छन् । 

हराएका बस र यात्रुको खोजीमा नेपाल प्रहरी, नेपाली सेना, सशस्त्र प्रहरी र गोताखोर परिचालन गरिएको छ । सशस्त्रले गोताखोरसँगै वाटर ड्रोन, सोनार क्यामेरा र पाइपलाइन इन्सपेक्सन सिस्टम प्रयोग गरी बेपत्ताहरूको खोजी गरिरहेको छ । शुक्रबारभन्दा शनिबार त्रिशूलीमा पानीको वहाब कम भएको छ । 

घाम लागेर नदीमा पानीको सतह केही घटे पनि यात्रु बस अझै भेटिएका छैनन् । सशस्त्र प्रहरी बलको चितवनस्थित कुरिनटारमा रहेको विपद् व्यवस्थापन तालिम शिक्षालयका उद्धारकहरूले पानीभित्र क्यामरा पठाएर खोजी सुरू गरेका छन् । यसले नदीको २० मिटर तलसम्म हेर्ने सकिने शिक्षालयका अधिकारीहरूले बताएका छन् । 

२० मिटर लम्बाइको केबलको एउटा छेउमा क्यामेरा हुन्छ । माथि बसेर स्क्रिनमा पानीभित्रको भिडियो हेर्न मिल्छ । कुरिनटारका गोताखोरहरू आज पानीभित्र गएर खोजतलास गरे पनि केही भेटिएको छैन् ।   दुईवटा यात्रुबस र त्यसमा यात्रारत करिब ५० यात्रु पहिरोमा परेर त्रिशूली नदीमा बेपत्ता छन् ।