कोटेश्वर–तीनकुने क्षेत्रको बाग्मती किनारमा वृक्षारोपण

३० असार, काठमाडौं । कोटेश्वर–तीनकुने क्षेत्रको बाग्मती किनारमा वृक्षारोपण गरिएको छ । म्यान्मारबाट आएकी समाजसेवी तुलसी थापाबाट प्राप्त १५ वटा तेजपातको बिरुवा वाग्मती सफाइ महाअभियानको पाँच सय ८३औँ हप्ताको अवसरमा आज वाग्मती किनारमा रोपिएको अभियानकर्मी किशोरसिंह शाहीले जानकारी दिए । 

वाग्मती सफाइका अभियानकर्मीहरुले  पिपल, ओखर, सुन्तला, एभोकाडो र तेजपात गरी ५० भन्दाबढी पाँच फिट अग्ला वृक्षारोपण गरिएको हो । वर्षामा आउने बाढीले वाग्मतीमा जम्मा भएका फोहर बगाएर लैजाने गरेकाले वर्षायाम लागेपछि नदी क्षेत्र सफा देखिने गरेको छ । सफाइमा काठमाडौं महानगरपालिका वडा नं ११ का अध्यक्ष हिरालाल तन्डुकार, नदी संरक्षण समितिका अध्यक्ष मेघ आले, वरिष्ठ कृषि विशेषज्ञ छवि पौडेललगायत अभियानकर्मीको सहभागिता थियो । नदी किनारमा भेटिएका नकुहिने फोहर काठमाडौँ महानगरपालिका, वातावरण विभागको गाडीले व्यवस्थापन गरेको थियो ।
 
वि.सं २०७० जेठ ५ गतेदेखि सुरु वाग्मती सफाइ अभियान अझै जारी छ । वाग्मती सफाइ महाअभियानबाट प्रभावित भई सहायक नदीमा पनि सफाइ अभियान सुरु गरिएको छ । चक्रपथका उत्तर पश्चिमी भेगमा सफाइ अभियान चलिरहेको छ । काठमाडौं उपत्यका बाहिरका प्रमुख नदीमा सफाइ सुरु भएको छ । हाल देशभर एक सय आठभन्दा बढी स्थानमा सफाइ भइरहेको महाअभियानले जनाएको छ । अर्को हप्ता वाग्मती सफाइ कोटेश्वर महादेव मन्दिरभन्दा तल वाग्मती  पहँेलो पुल अर्थात् गणेश मन्दिर चोक क्षेत्रमा गरिने जानकारी दिइएको छ ।