कांग्रेस र एमालेले १७ मन्त्रालय राखेर बाँकी सानालाई दिने गरी भागवण्डा मिलाइँदै, जनमतले संघ नपाउने सम्भावना

३० असार, काठमाडौं । प्रधानमन्त्रीसँगै शपथ खुवाउने गरी आफ्नो भागमा परेका मन्त्री छान्ने गृहकार्यमा कांग्रेस र एमाले जुटेका छन् । चौथो पटक प्रधानमन्त्री बन्दै गरेका नेकपा एमालेका अध्यक्ष केपी शर्मा ओलीले सोमबार सोमबार बिहान ११ बजे प्रधानमन्त्रीको शपथ लिँदैछन् । राष्ट्रपति रामचन्द्र पौडेलले ओलीलाई आज आइतबार साँझ प्रधानमन्त्रीमा नियुक्त गर्ने कार्यतालिका छ । 

ओलीले शुक्रबार राति सवा ९ बजे राष्ट्रपति समक्ष संविधानको धारा ७६(२) बमोजिम प्रधानमन्त्रीमा दाबी पेस गरेका थिए । सोमबार शपथसँगै ओली नेतृत्वको मन्त्रिपरिषद्लाई पूर्णता दिने गरी कांग्रेस र एमाले मन्त्रालय भागबन्डा र मन्त्रीहरूको छनोटमा जुटेका छन् । ओली प्रधानमन्त्रीमा नियुक्त हुने समयसम्ममा मन्त्रालयको भागबण्डा सकिने बताइएको छ । अहिले कांग्रेस र एमालेका नेता मन्त्रालय टुंग्याउने गृहकार्यमा छन् ।  

मन्त्री छनोट गर्न एमालेमा जति सजिलो छ कांग्रेसमा त्यो सहजता देखिएको छैन । यद्यपि कांग्रेस सभापति शेरबहादुर देउवाले यो पटक विवाद नआउने गरी नाम टुंग्याउने कोसिस गरिरहेका छन् । उनले इतर समूहका नेता डा. शेखर कोइरालासँग निरन्तर परामर्श गरिरहेको नेताहरु बताउँछन् । कांग्रेसका एक नेताले नेपालबहसलाई बताए अनुसार अहिले दुई दलबीच मन्त्रालय टुंग्याउने गृहकार्य भइरहेको छ । 

साना पार्टी पनि ओली नेतृत्वको सरकारमा सहभागी हुन इच्छुक देखिएकाले उनीहरुलाई कुन कुन मन्त्रालय छाड्ने भन्ने पनि भइरहेको छ । सम्भवतः सरकारमा सहभागी हुने साना दललाई पनि सोमबार नै एकैपटक मन्त्रीको शपथ गराइने तयारी छ । उनका अनुसार जनता समाजवादी पार्टी, जनता समाजवादी पार्टी (नेपाल), लोकतान्त्रिक समाजवादी पार्टी (लोसपा), नागरिक उन्मुक्ति पार्टी (नाउपा) र जनमत पार्टी सरकारमा सहभागी हुनेछन् । 

उनीहरुलाई एकएक मन्त्रालय दिने वा चार मन्त्रालय र एक राज्यमन्त्री दिने गरी छलफल भइरहेको छ । उनीहरुलाई सोमबार नै सरकारमा सहभागी गराउने गरी कांग्रेस र एमालेबीच समझदारी बनेको छ ।  कांग्रेसका ति नेताले मन्त्रालय भागबन्डामा करिव–करिब सहमति नजिक पुगिएको बताएका छन् । कुल २१ मन्त्रालयमध्ये सरकारको नेतृत्व गर्ने एमालेले अर्थसहित ८ मन्त्रालय र कांग्रेसले ९ मन्त्रालय लिने मोटामोटी समझदारी बनेको हो ।

बाँकी मन्त्रालय अरु दललाई दिइनेछ । तर, यो अनुसार १ मन्त्रालय मिलेको छैन । यसमा राम्रो मन्त्रालयको राज्यमन्त्रीमा सहमति गराउने वा मधेश सरकारको नेतृत्वमा जनमत रहेकाले उसलाई संघीय मन्त्रालय नदिने र उतै व्यवस्थापन गर्ने कुरा पनि भइरहेको छ । जनमतलाई मधेशमा मिलाउन सके अरु चार दलले एकएक मन्त्रालय लिनेछन् । अन्यथा जनमतलाई एमालेको भागको एक मन्त्रालय दिने कोसिस जारी छ । यसरी मन्त्रालयको भागबण्डा आज सकिने उनले बताए । जनमत पार्टीलाई मधेशमा नै मिलाउने मुल प्रयास छ । 

मन्त्रीहरूमा को-को पर्छन् भन्ने कांग्रेस र एमालेले टुङ्ग्याइसकेका छैनन् । अहिले यस विषयमा कांग्रेस र एमालेका शीर्ष नेताहरु लागिरहेका छन् । कांग्रेस र एमालेका भागमा परेका मन्त्रालयको अवस्था हेरी सोही अनुसारका व्यक्तिहरू छान्ने प्रयास भइरहेको छ । मन्त्री बन्न नेताहरूको लबिङ पनि जारी छ । आज साँझसम्ममा मन्त्रीहरूको पनि लिस्ट सार्वजनिक हुने बताइएको छ ।