विपद्को बेला छ, सरकार छैन भनेर आफ्नो कर्तव्य र जिम्मेवारी नभुल्नुः प्रचण्ड

३० असार, काठमाडौं । कामचलाउ हैसियतका प्रधानमन्त्री पुष्पकमल दाहाल प्रचण्डले सरकार छैन भनेर विपद्का बेला आफ्नो कर्तव्य नभुल्न तीनवटै सुरक्षा निकायका प्रमुखलाई निर्देशन दिएका छन् । आइतबार बिहान प्रचण्डले निजी निवास खुमलटारमा बोलाएर सुरक्षा निकायका प्रमुखसँग बस दुर्घटनाको पछिल्लो अवस्थाबारे जानकारी लिँदै जिम्मेवारी र कर्तव्य नभुल्न निर्देशन दिएका हुन् ।  

प्रधानमन्त्रीले सबै उपायहरूको अवलम्बन गरी खोजी कार्यलाई अझै तीव्रता दिन सुरक्षा निकायका प्रमुखहरूसँग आग्रह गरे । उनले  सिमलताल लगायत देशभरका दुर्घटनामा जोखिम मोलेर खोज, राहत र उद्धारमा संलग्न सुरक्षाकर्मीलाई धन्यवाद पनि दिएको प्रधानमन्त्रीको निजी सचिवालयले जानकारी दिएको छ ।

प्रधानमन्त्री प्रचण्डले खुमलटारमा बोलाएर नेपाली सेना, नेपाल प्रहरी र सशस्त्र प्रहरीका प्रमुखलाई हराइरहेका यात्रुहरूको खोजीलाई तीव्रता दिन निर्देशन दिएका हुन् । सिमलताल बस दुर्घटनापछिको खोजी कार्य र पछिल्लो अवस्थाको जानकारी लिँदै हराइरहेकाहरूको खोजी कार्यलाई अझै तीव्रता दिन निर्देशन दिए । उनले सिमलताल लगायत देशका विभिन्न भागमा बाढी, पहिरो, डुबान लगायतका प्राकृतिक विपत्तिको कारण भएको जनधनको क्षतिप्रति दुख व्यक्त गरेका थिए।

देशको राजनैतिक परिस्थिति जे–जस्तो भएता पनि स्थायी सरकारको रुपमा रहेको कर्मचारीतन्त्र र सुरक्षा निकायले अविचलित र अभिछिन्नरुपमा जनताको सेवामा लागि पर्न उनले आग्रह गरे । उनले विश्वास मत नपाएपछि शुक्रबार पदमुक्त भएका थिए । राष्ट्रपति रामचन्द्र पौडेलले नयाँ प्रधानमन्त्री नियुक्त नहुन्जेल दाहाललाई नै कामचलाउ प्रधानमन्त्रीको जिम्मेवारी दिएका छन् ।