कोइराला समूहले देउवालाई पठायो मन्त्री बनाउने चार जनाको नाम

३० असार, काठमाडौं । नेपाली कांग्रेसकाे शेखर कोइराला समूहले एमालेका अध्यक्ष केपी शर्मा ओली नेतृत्वमा बन्ने सरकारमा पठाउने मन्त्रीको नाम टुंगो लगाएको छ । आइतबार बिहान बसेको सो समूहको बैठकले छानेका नाम नेता शेखर कोइरालाले सभापति शेरबहादुर देउवासमक्ष पठाएका छन् । 

कोइराला समूहले चार मन्त्रालय पाएको दावी गरेको छ । जसमा सुर्खेतबाट निर्वाचित सांसद हृदयराम थानी, धादिङबाट निर्वाचित रामनाथ अधिकारी, काठमाडौंबाट निर्वाचित प्रदीप पौडेल र सप्तरीबाट निर्वाचित तेजुलाल चौधरीको नाम पठाएको छ ।  
 
मन्त्री बन्न सहमहामन्त्रीद्वय बद्री पाण्डे र जीवन परियार मुख्य आकांक्षी थिए । तर, उनीहरू परेका छैनन् । राज्यमन्त्री पाए लीला बोखिम, प्रतिमा गौतम, मैना कार्की रावललाई पठाउने कोइराला समूहको तयारी छ । कोइरालाले केहीबेर अघि चार जनाको नाम सभापति देउवालाई सिफारिस गरेका हुन् ।