कांग्रेसले र एमालेले लिने १७ मन्त्रालयको टुंगो लाग्यो

३० असार, काठमाडौं । आइतबार विहानदेखि छलफलमा जुटेका नेपाली कांग्रेस र नेकपा एमालेका शीर्ष नेताहरुले मन्त्रालयको भागबन्डा टुंग्याएका छन् । सहमति अनुसार ४ मन्त्रालय अन्य दललाई छुट्टाएको छ । कांग्रेसले गृहसहित ९ र एमालेले अर्थसहित ८ मन्त्रालय लिनेछ ।

कांग्रेसले लिने मन्त्रालयहरूमा गृह, रक्षा, ऊर्जा, स्वास्थ्य, सहरी विकास, पर्यटन, कानुन, परराष्ट्र र वन मन्त्रालय रहेका छन् । एमालेले प्रधानमन्त्रीसहित अर्थ, भौतिक योजना, सञ्चार, शिक्षा, उद्योग, सामान्य प्रशासन र भूमि व्यवस्था मन्त्रालयको नेतृत्व गर्नेछ । 

संविधानको धारा ७६ (२) अनुसार प्रधानमन्त्री दाबी गरेका एमाले अध्यक्ष केपी शर्मा ओलीलाई आज आइतबार राष्ट्रपतिले नियुक्त गर्दैछन् । उनको सोमबार बिहान ११ बजे शपथ ग्रहण हुनेछ । ओलीले राष्ट्रपतिबाट शपथ लिएलगत्तै मन्त्रिपरिषद् विस्तार गर्ने तयारी गरेका छन् । मन्त्रीहरूको नाम आज रातीसम्ममा तय हुने बताइएको छ ।  
उपेन्द्र यादव नेतृत्वको जसपा नेपाल, अशोक राई नेतृत्वको जसपा, लोसपा, नाउपा र जनमत पार्टी पनि सरकारमा जाने तयारीमा छन् । जनमतलाई मधेशमा मिलाएर अरु पार्टीलाई एकएक मन्त्रालय दिने तयारी छ ।