त्रिशूलीमा बेपत्ता बस र यात्रुको आज पनि खोजी गरिँदै, भारत र बंगलादेशलाई सहयोग गर्न आग्रह

३१ असार, भक्तपुर । त्रिशूली नदीमा हराइरहेका दुई बस र त्यसमा सवार यात्रुको खोजी आज पनि जारी छ । खोज तथा उद्धार कार्यमा सशस्त्र प्रहरीको गोताखोरसहित नेपाली सेना, नेपाल प्रहरीका गरी करिब पाँच सय जनाको टोली परिचालन गरिएको छ ।

बेपत्ता भएका यात्रुमध्ये अहिलेसम्म १२ जनाको शव फेला परेको छ । तीमध्ये पाँच जनाको सनाखत भएको छ भने सात जनाको सनाखत हुन बाँकी छ । यसैबीच,  सरकारले खोजी कार्यका लागि भारत र बंगलादेशसँग पनि सहयोग मागेको छ ।

आइतबार गृहसचिव एकनारायण अर्यालसहित सिमलताल क्षेत्रको स्थलगत अनुगमन गरेर फर्किएपछि गृह मन्त्रालयका अधिकारीहरुले भारत र बंगलादेशका अधिकारीहरुसँग सम्पर्क गरी सहयोग मागेका हुन् ।

खोजी कार्यमा थप सहयोग गर्न भारत र बंगलादेशलाई भनेको स्थलगत अनुगमन टोलीमा सहभागी गृह मन्त्रालय अन्तर्गतको द्वन्द्व तथा विपद व्यवस्थापन महाशाखा प्रमुख डा. भीष्मकुमार भूसालले बताए ।   उनीहरुलाई घटनास्थलको अवस्था र पानीको बहावको वेग लगायतका जानकारी आइतबार नै पठाइएको भन्दै भुसालले उताबाट प्रतिउत्तरको प्रतीक्षामा रहेको बताए ।