साउन महिनाका लागि बैंकहरुको ब्याजदर सार्वजनिक, मुद्दति निक्षेपमा अधिकतम ७.५३ प्रतिशत दिने

३१ असार, काठमाडौं । वाणिज्य बैंकहरुले आगामी साउन महिनाका लागि पनि निक्षेपको ब्याजदर थप घटाएका छन् । २० वाणिज्य बैंकहरुमध्ये १३ बैंकहरुले साउन महिनाका लागि व्याजदर घटाएका छन् । ५ वटा बैंकहरुले असार महिनाकै ब्याजदरलाई निरन्तरता दिएका छन् भने २ बैंकहरुले असारको तुलनामा ब्याजदर केही बढाएका छन् । 

साउनको लागि बैंकहरुले व्यक्तिगत मुद्दती निक्षेपको अधिकतम ब्याजदर ७.५३ प्रतिशत दिने भएका छन् । असारमा बैंकहरुले व्यक्तिगत मुद्दतीमा दिएको औसत ब्याजदर ६.९१ प्रतिशत रहेकोमा साउनमा घटेर ६. ७३ प्रतिशतमा झरेको छ ।  
 
लामो अवधिको व्यक्तिगत मुद्दती निक्षेपमा केही उच्च ब्याजदर र छोटा अवधिको मुद्दती निक्षेपमा ब्याजदर केही कम गर्ने नीति बैठकहरूको देखिन्छ । निक्षेपको ब्याजदर घट्दा आधार दर घटेर कर्जाको ब्याजदरमा ऋणीलाई राहत हुन्छ । राष्ट्र बैंकले व्यक्तिगत मुद्दती निक्षेपको माथिल्लो सीमा र बचतको न्यूनतम ब्याजदरबीच अन्तर बढीमा ५ प्रतिशतभन्दा हुन नहुने व्यवस्था गरेको छ ।

यस्तै कल निक्षेपमा बचतको न्यूनतम ब्याजदरको ५० प्रतिशत मात्रै ब्याज दिन पाइने व्यवस्था छ । संस्थागत मुद्दती निक्षेपमा व्यक्तिगत मुद्दती निक्षेपभन्दा कम्तीमा १ प्रतिशत बिन्दुले ब्याजदर कम गर्नुपर्छ । बैंकहरूले व्यक्तिगत मुद्दती निक्षेपको अधिकतम ब्याजदर घटाएपछि मात्रै बचत र कल निक्षेपको ब्याजदर घटाउन सक्छन् । ब्याजदर निर्धारण गर्ने आधारका रूपमा बैंकले अघिल्लो महिनाको अधिकतम ब्याजदरको औसत निकालेर त्यसको १० प्रतिशत मात्रै तलमाथि गर्न सक्ने व्यवस्था छ ।

साउनमा एनएमबी र एनआइसी एशिया बैंकले अहिले व्यक्तिगत मुद्दतिमा सबैभन्दा धेरै ब्याज दिएका छन् । एभरेष्ट र कृषि विकास बैंकले ब्याजदर बढाएका छन् । लक्ष्मी सनराइज बैंक, स्ट्यान्डर्ड चार्टर्ड बैंक, नेपाल इन्भेष्टमेन्ट बैंक, नेपाल एसबिआई बैंक र नबिल बैंकको ब्याजदर स्थिर छ ।

१३ बैंकहरुले साउन महिनाका लागि व्याजदर घटाएका छन् । जसमध्ये राष्ट्रिय वाणिज्य बैंकले ०.२ प्रतिशत व्याजदर घटाएको छ भने ग्लोबल आईएमई बैंक, प्राइम कर्मसियल बैक, सिद्धार्थ बैक., स्टान्डर्ड चार्टड बैंकले ०.२५ प्रतिशत व्याजदर घटाएका छन् । नेपाल बैंक, हिमालयन बैंक, माछापुच्छे बैंक, प्रभु बैंकले ०.५ प्रतिशत व्याजदर घटाउँदा कुमारी बैंकले ०.०५ प्रतिशत व्याजदर घटाएको छ ।

सानिमा बैंकले ०.७ प्रतिशत ब्याजदर घटाएको छ भने सिटिजन्स बैंक इन्टरनेशनलले ०.१५ प्रतिशत र एनआइसी एसियाले ०.१६ प्रतिशत ब्याजदर घटाएका छन् । लक्ष्मी सनराइज बैंक, स्ट्यान्डर्ड चार्टर्ड बैंक, नेपाल इन्भेष्टमेन्ट बैंक, नेपाल एसबिआई बैंक र नबिल बैंकको ब्याजदर स्थिर छ । 

लक्ष्मी सनराइज बैंकले ६.५ प्रतिशत व्याजदर दिएको छ भने स्ट्यान्डर्ड चार्टर्ड बैंक र नेपाल इन्भेष्टमेन्ट मेघा बैंक र नबिल बैंक ले ७ प्रतिशत व्याजदर दिदै आएको छ । यस्तै नेपाल एसबिआई बैंकले ६.३ प्रतिशत व्याजदर दिदै आएको छ । यसरी ब्याजदर निर्धारण गर्दा कायम हुने अधिकतम र न्यूनतम ब्याजदरबीच अन्तर उक्त निर्देशनले तोकेको सीमाभन्दा बढी हुन गए अधिकतम वा न्यूनतममध्ये सोही एक दर कायम गरी अन्य दर समायोजन गर्नुपर्ने व्यवस्था छ ।