प्रधानमन्त्रीमा ओलीको नियुक्ति बदर गर्न माग गर्दै सर्वोच्चमा रिट दायर

३१ असार, काठमाडौं । नेकपा एमालेका अध्यक्ष केपी शर्मा ओलीलाई संविधानमा भएको प्रावधान विपरीत प्रधानमन्त्रीमा नियुक्त गरिएको भन्दै यसलाई बदर गर्न माग गर्दै सर्वोच्च अदालतमा रिट दायर भएको छ ।  

संविधानको धारा ७६(२) अनुसार प्रधानमन्त्रीको नियुक्ति र शपथ गर्न नमिल्ने भन्दै यसविरुद्ध सर्वोच्च अदालतमा रिट दायर भएको हो । खगेन्द्र चापागाईँ, शैलेन्द्र गुप्ता र दीपक अधिकारीले प्रधानमन्त्री केपी शर्मा ओलीको नियुक्ति र शपथ बदरको माग गर्दै सोमबार सर्वोच्चमा रिट दायर गरेका हुन् । 

रिट निवेदकले संविधानको धारा ७६(२) अनुसारको प्रधानमन्त्री नियुक्ति बदर गर्दै ३ अनुसार नयाँ नियुक्ति गर्न माग गरेका छन् । राष्ट्रपति रामचन्द्र पोडेलले आइतबार ओलीलाई प्रधानमन्त्रीमा नियुक्त गरेका थिए । सोमबार अहिले उनको शपथ कार्यक्रम राखिएको छ । रिटमा राष्ट्रपतिको कार्यालय, प्रधानमन्त्री तथा मन्त्रिपरिषद् कार्यालय, संसद् सचिवालय र प्रतिनिधिसभालाई विपक्षी बनाइएको छ ।