नेपाली कांग्रेसबाट १० जना बने मन्त्री, यस्ता छन मन्त्रालय

३१ असार, काठमाडौं । संसदको सबैभन्दा ठूलो दल नेपाली कांग्रेसबाट एमाले अध्यक्ष केपी ओली नेतृत्वको सरकारमा १० जना मन्त्री बनेका छन् । कांग्रेसबाट सरकारमा गएका मन्त्रीहरूको नेतृत्व गर्दै प्रकाशमान सिंह उपप्रधान तथा शहरी विकास मन्त्री बनेका छन् । 

प्रधानमन्त्री ओलीले आजै २२ सदस्यीय मन्त्रिपरिषद गठन गरेका छन् । जसमा कांग्रेसले उपप्रधानसहित १० मन्त्रालय पाएको हो । नवनियुक्त मन्त्रीहरूलाई राष्ट्रपति रामचन्द्र पौडेलले पद तथा गोपनीयताको शपथ गराएका थिए । सबै मन्त्रीहरूले आजैबाट कार्यभार सम्हाल्ने छन् ।  
 
कांग्रेसका रमेश लेखकले गृह मन्त्रालय पाएका छन् । सभापति शेरबहादुर देउवा पत्नी आरजु राणा देउवा परराष्ट्रमन्त्री बनेकी छन् । तेजुलाल चौधरीले युवा तथा खेलकुद मन्त्रालय पाएका छन् । प्रदीप पौडेल स्वास्थ्य मन्त्री भएका छन् भने अजय चौरसिया कानुन न्याय तथा संसदीय मामिला मन्त्री बनेका छन् । 

यस्तै बद्रीप्रसाद पाण्डेले पर्यटन मन्त्रालय, रामनाथ अधिकारीले कृषि मन्त्रालय, दीपक खड्काले जलस्रोत तथा ऊर्जा मन्त्रालय र ऐनबहादुर शाही ठकुरीले वन तथा वातावरण मन्त्रालयको जिम्मेवारी पाएका छन् । यसअघि चर्चामा रहेका सहमहामन्त्रीहरू किशोरसिंह राठाैर र जीवन परियारले भने मौका पाएनन् । महिलाबाट पनि आरजुले मात्र मौका पाइन् ।