त्रिशुली बस दुर्घटनाबारे अध्ययन गर्न १० दिनको समय दिएर गृहमन्त्रीले बनाए कार्यदल

३१ असार, काठमाडौं । सोमबार नियुक्त गृहमन्त्री रमेश लेखकले चितवनको सिमलतालमा पहिरोले बगाएर त्रिशुलीमा हराइरहेका दुइटा बसको अध्ययन गर्न कार्यदल गठन गरेका छन् । गृहमन्त्री लेखकले पदभार ग्रहण गर्दै सिमलताल घटना अध्ययन गर्न कार्यदल गठन गर्ने निर्णय गरेका हुन् ।

गृह मन्त्रालयका सहसचिव छवि रिजालको नेतृत्वमा ६ सदस्यीय कार्यदल गठन गर्ने निर्णय भएको हो । जसमा नेपाल प्रहरी, सशस्त्र प्रहरी, सडक विभाग, राष्ट्रिय विपद जोखिम न्यूनीकरण तथा व्यवस्थापन प्राधिकरणका प्रतिनिधि राखेर समिति गठन गरिने भएको छ । उक्त कार्यदललाई १० दिनको समय दिइएको छ । 

गत शुक्रबार सिमलतालमा पहिरोले बगाएर त्रिशूलीमा बेपत्ता बनाएको दुइटा गाडीको घटनाबारे अध्ययन गर्न बनेको कार्यदल  सिमलतालमा कसरी पहिरो गएको, के कारणले घटना भयो, यस्ता घटना दोहोरिन नदिन के गर्ने, बेपत्ता भएकाहरूलाई राहत के–कसरी उपलब्ध गराउने भन्ने विषय समेटेर प्रतिवेदन तयार पार्नेछ । गृहमन्त्री लेखकले पनि प्राकृतिक प्रकोपबाट उत्पन्न परिस्थितिसँग जुध्नु नै पहिलो निर्णय भएको बताएका छन् ।