सरकारविरुद्ध रणनीति बनाउन थाल्यो समाजवादी मोर्चा

१ साउन, काठमाडौं । ओली नेतृत्वको सरकारलाई काउण्टर दिने गरी रणनीति बनाउन समाजवादी मोर्चाले तयारी थालेको छ । यसबारे साझा धारणा बनाउन मोर्चाको बैठकमा छलफल चलाइएको छ ।

आलोकनगरस्थित नेकपा एकीकृत समाजवादीको पार्टी कार्यालयमा बसेको बैठकमा सरकारलाई खबरदारी  गर्न एक भएर अगाडि बढ्नुपर्ने बताइएको छ ।  

प्रधानमन्त्रीबाट हटेपछि नेकपा माओवादी केन्द्रका अध्यक्ष पुष्पकमल दाहाल प्रचण्डले रणनीति बनाउन छलफल चलाएका हुन् । उनी नेतृत्वको सरकार ढलेपछि मोर्चाको पहिलो बैठक बसेर आगामी रणनीति तय गर्न लागेको हो । 

मंगलबारको बैठकमा प्रचण्डसहित एकीकृत समाजवादीका अध्यक्ष माधव कुमार नेपाल, नेपाल समाजवादी पार्टीका अध्यक्ष महेन्द्र राय यादव, नेकपाका महासचिव नेत्रविक्रम चन्द (विप्लव) र आबद्ध पार्टीका दोस्रो तहका नेताहरू पनि सहभागी थिए ।