चितवनमा सर्भेका कर्मचारी चढेको गाडीमाथि आगजनी

२ साउन, चितवन । चितवन महानगरपालिका वडा नम्बर ७ का स्थानीयले एक गाडीमाथि आगजनी गरेका छन् । रेलमार्गको सर्भे गर्न पुगेका कर्मचारीको टोली चढेको गाडीमा आगजनी गरेका हुन् । बुधबार दिउँसो भरतपुर ७ मा पुगेको गाडीलाई स्थानीयले नियन्त्रणमा लिएर आगजनी गरेका हुन् ।

चितवनका डीएसपी भेषराज रिजालका अनुसार दुई जना कर्मचारी चढेर आएको गाडीमाथि स्थानीयले आगजनी गरेका थिए । आगजनी गर्ने स्थानीयको खोजी भइरहेको रिजालले जानकारी दिए । सरकारबाट अनुमति लिएर पूर्वपश्चिम रेलमार्गको सर्वेक्षण गर्न आरएच कन्सल्टेन्सीको टोली सवारी साधान र उपकरण लिएर आएको थियो । स्थानीय बासिन्दाले कब्जामा लिएपछि घटनास्थलमा प्रहरी पुगेको थियो । 

पूर्वपश्चिम रेलमार्ग निर्माण गर्नका लागि अहिले टोली चितवन क्षेत्रको सर्भेमा रहेको छ । सो टोलीले हेटौंडादेखि बर्दघाटसम्मको सर्भे गर्ने कार्यक्रम रहेको छ । स्थानीयले बस्ती छलेर रेल लैजान माग गर्दै आएका छन् । चितवनसहित अन्य जिल्लामा पनि बस्तीबाटै रेलमार्गको सर्भे गरिएको भन्दै विरोध भइरहेको छ ।