विदेशी बैंकमा पैसा राखेको भन्दै राजश्व अनुसन्धान विभागले सुनील पौडेलविरुद्ध हाल्यो मुद्दा

२ साउन, काठमाडौं । नेपालमा गैरकानुनी कारोबारबाट कमाएको पैसा विदेशी बैंकमा राखेको अभियोगमा सुनील पौडेलविरुद्ध अर्को मुद्दा दर्ता भएको छ । राजश्व अनुसन्धान विभागले पौडेलविरुद्ध अवैध विदेशी विनिमयसम्बन्धी अभियोगमा बुधबार काठमाडौं जिल्ला अदालतमा मुद्दा दायर गरेको हो ।

पौडेलले विदेशी विनिमय नियमित गर्ने ऐन, २०१९ को दफा १६ विपरीत विदेशी बैंकमा पैसा राखेको विभागको भनाइ छ । सिंगापुरको युनाइटेड ओभरसिज बैंकमा ५८ हजार अमेरिकी डलर राखेको विषयमा विभागले अनुसन्धान थालेको थियो । पौडेलविरुद्ध उक्त रकमको कानुनअनुसार तीन गुणा बढी अर्थात् दुई करोड ३२ लाख ३७ हजार ७०० रुपैयाँ बिगो माग दाबी गर्दै मुद्दा दायर गरेको छ । 

पौडेलविरुद्ध मुद्दा दायर गरिएको काठमाडौं जिल्ला अदालतले जानकारी दिएको छ । यसअघि, नेशनल पेमेन्ट गेटवे खरिदमा भ्रष्टाचार गरेको अभियोगमा गत वर्षको असोजमा अख्तियार दुरुपयोग अनुसन्धान आयोगले पौडेलसहित नौ जनाविरुद्ध विशेष अदालतमा मुद्दा दायर गरेको थियो ।