लुम्बिनीमा सुरु भएन नयाँ सरकार गठनको औपचारिक प्रक्रिया, निर्णय कुर्दै महरा

३ साउन, बुटवल । लुम्बिनी प्रदेशको मुख्यमन्त्री को बन्ने र नयाँ सरकार बनाउने प्रक्रिया कहिले सुरु हुने भन्ने यकिन छैन् । केन्द्रको निर्णयमा मुख्यमन्त्री को भन्ने टुंगो लाग्ने भएपनि नेपाली कांग्रेसले प्रदेश सरकारको नेतृत्व पहिलो चरणमै पाउनुपर्ने दाबी गरेको छ । अहिलेका मुख्यमन्त्री जोखबहादुर महरा पनि प्रक्रिया सुरु नभएको भन्दै चुपचाप बसिरहेका छन् । 

केन्द्रमा कांग्रेस–एमालेले नयाँ गठबन्धन बनाउँदा एमालेले नेतृत्व गर्ने सहमति भएको भनिए पनि आधिकारिक निर्णय भएको छैन् । कांग्रेसका प्रदेश सभापति अमरसिंह पुनले लामो समय माओवादी र एमालेले सरकारको नेतृत्व गरेकाले यसपटक आफूहरूको मुख्यमन्त्री दाबी रहेको बताएका छन् । केन्द्रमा फेरिएको सत्ता समीकरणसँगै लुम्बिनीमा सत्ता साझेदार दल एमालेले समर्थन फिर्ता लिएको छ । मुख्यमन्त्री महरा अल्पमतमा छन् ।

२० असारमा उनी अल्पमतमा परेपछि विपक्षी दलहरूले मुख्यमन्त्रीले राजीनामा दिनुपर्ने बताउँदै आएका छन् । तर, मुख्यमन्त्री महराले राजीनामा दिएका छैनन् । उनले एमाले र कांग्रेसले नयाँ सरकार गठनका लागि औपचारिक प्रक्रिया नै सुरु नगरेकाले आफ्नो राजीनामा आउन ढिला भएको प्रष्टीकरण दिंदै आएका छन् । महराले नयाँ सरकार गठनको संवैधानिक प्रक्रियामा गएपछि मात्रै आफूले राजीनामा दिने वा के गर्ने भन्ने निर्णय लिने बताएका छन् । 

सत्ता साझेदार दलले समर्थन फिर्ता लिएको अवस्थामा ३० दिनभित्र विश्वासको मत लिन पाउने संवैधानिक व्यवस्था छ । यद्यपि महराले विश्वासको मत लिने प्रक्रियामा पनि गएका छैनन् । कांग्रेस कि एमालेबाट मुख्यमन्त्री बन्नेसमेत टुंगो नलागेकोले आफूले अहिले नै केही निर्णय नगर्ने उनले बताए । 

महराले कांग्रेस–एमालेले नयाँ मुख्यमन्त्रीको नटुंगाउँदै राजीनामा दिंदा प्रदेश सरकारविहीन हुने भएकाले उनीहरूको निर्णयलाई पर्खेको बताए । कांग्रेसकै एक प्रदेश सभा सदस्यले रुपन्देहीबाट एमाले उपाध्यक्ष विष्णु पौडेल संघीय सरकारको अर्थमन्त्री भइसकेकाले प्रदेशमा भेगीय शक्ति सन्तुलन मिलाउन पहिलो चरणको मुख्यमन्त्री कांग्रेसले पाउन सक्ने बताउँछन् ।