बजेट खर्चको अख्तियारी, यस्तो छ अर्थको ७३ बुँदे परिपत्र

३ साउन, काठमाडौं । नयाँ आर्थिक वर्ष सुरु भएसँगै अर्थ मन्त्रालयले सबै निकायलाई बजेट खर्चको अख्तियारी दिएको छ । बुधबार जारी पएको परिपत्रमा सबै विषयगत मन्त्रालय, प्रदेश र स्थानीय तहलाई चालु आर्थिक वर्ष २०८१/८२ को बजेट कार्यान्वयनसम्बन्धी मार्गदर्शन पठाइएको हो । परिपत्रमा बजेट खर्चमा मितव्ययिता, प्रभावकारिता र दक्षता बढाउने कुरा समेटिएका छन् । 

बजेट खर्चको अख्तियारी, कार्यक्रम स्वीकृति तथा बजेट बाँडफाँट, कार्यक्रम/योजना हस्तान्तरण र कार्यान्वयन, बजेट खर्च, रकमान्तर, कार्यक्रम संशोधन तथा प्रतिवेदन, वित्तीय पारदर्शिता, जवाफदेहिता, अनुगमनसम्बन्धी व्यवस्थालगायत विषय समेटेर काम गर्न मार्गदर्शनमा भनिएको छ । कुनै पनि निकायलाई एकभन्दा बढी निकायबाट खर्च गर्नेगरी रकम विनियोजन नगर्न भनिएको छ । 

यस्तो भएकामा त्यस्तो निकायको प्रमुखले आगामी असोज मसान्तभित्र विनियोजन भएको सम्पूर्ण रकम खर्च गर्ने निकायलाई हासिल गर्नुपर्ने प्रतिफल तथा उपलब्धिसहित स्रोतगत बाँडफाँट गरी त्यसको जानकारी अर्थ मन्त्रालय पठाउन भनिएको छ । चालु आर्थिक वर्षका लागि बजेट पाएका योजना तथा कार्यक्रम कार्यान्वयनका लागि यही साउन मसान्तभित्रमा कार्यविधि तयार गरिसक्नुपर्ने भनिएको छ । 

कार्यविधि स्वीकृत भएको सात दिनभित्र वेबसाइटमा राखिसक्न र थप आर्थिक दायित्व वा दीर्घकालीन प्रकृतिको दायित्व सिर्जना हुने कार्यविधि बनाउँदा अर्थ मन्त्रालयको अनिवार्य स्वीकृति लिनुपर्ने परिपत्रमा उलेख छ ।