साउन ६ गते विश्वासको मत लिएर ७ गते प्रधानमन्त्रीले सांसदसँग प्रश्नोत्तर गर्ने

३ साउन, काठमाडौं । सभामुख देवराज घिमिरेले प्रधानमन्त्री केपी शर्मा ओलीले प्रतिनिधिसभाको बैठकमा विश्वासको मत लिने विषयमा छलफल गरेका छन् । बैठकमा सदन चलाउने क्यालेण्डरको विषयमा पनि छलफल भएको थियो । भोली कार्य व्यवस्थाको बोलाइएको छ । 

आजदेखि १५ गतेसम्मको बैठक कुन कुन दिनमा बस्ने, विधेयकहरूमाथि छलफल गर्नको लागि समितिलाई कहिले समय दिने, थप छलफलको लागि भोलि दिउँसो १ बजे बस्ने कार्य व्यवस्था परामर्श समितिको बैठकले निर्णय गर्ने भएको छ । प्रतिनिधि सभामा साउन ६ गतेको प्रधानमन्त्री केपी शर्मा ओलीले विश्वासको मत प्रस्ताव पेस गर्न समय मागेका छन् । यसलाई कसरी व्यवस्थित गर्नेलगायतका विषयमा आज छलफल र  कुराकानी भएको छ । 

प्रधानमन्त्री ओलीले साउन ६ गते विश्वास मत लिने र साउन ७ गते प्रतिनिधि सभामा सांसदहरूसँग प्रत्यक्ष प्रश्नोत्तर गर्ने कार्यक्रम पनि तय भएको छ । सोही प्रयोजनका लागि गृहकार्यस्वरूप सभामुखले सचेतकहरूसँग छलफल गरेका थिए । नेकपा एमालेका मुख्यसचेतक महेश बर्तौलाका अनुसार प्रधानमन्त्रीले विश्वास मत लिने सूचना संसद सचिवालयलाई पठाइसकिएको छ । 

उनकाअनुसार कुन बैठकमा कुन विधेयक पेस गर्ने भन्ने कार्यसूची पनि तयार गर्न खोजिएको छ । साउन ६, ७ र ८ र १३, १४ र १५ गते प्रतिनिधि सभा बैठक बस्ने निर्धारण भएको छ । अन्य दिनमा समिति बैठक बस्ने र समितिमा विचाराधीन विधेयकमा छलफल चलाउने कुरा भएको छ । संसदीय सुनुवाइ समितिमा सभापति चयनका विषयमा पनि छलफल भएको छ ।