सरकार बनेसँगै प्रहरीमा हलचल, दुई एआईजीको सरुवा चर्चा

४ साउन, काठमाडौं । नयाँ सरकार बन्ने बित्तिकै नेपाल प्रहरीमा हलचल शुरु भएको छ । खासगरी अघिल्लो सरकारको समयमा हाइहाइ पाएका प्रहरी अधिकृतहरूलाई अहिलेको सरकारले च्याप्छ कि फ्याँक्छ भन्ने निश्चित नभएकाले हलचल शुरु भएको हो ।

रवि लामिछाने गृहमन्त्रीमा आएपछि उनले के के न गर्छु भन्दै सुन तस्करीको सफल अनुसन्धान गर्ने प्रहरी अधिकारीलाई उल्टै कारवाहीको सिफारिस गरिदिए । उनीहरुको तुरुन्तै सरुवा मात्रै गरेनन्, कारवाही गर्नुपर्छ भनेर प्रधानमन्त्रीलाई ताकेता गर्न थाले । रविले आईजीपी वसन्त कुँवरलाई कारबाहीका लागि ताकेता गर्न थाले ।

त्यही क्रममा अरु असफल भए म सफल हुन्छु भन्दै नेपाल प्रहरीको केन्द्रीय अनुसन्धान ब्यूरो (सीआईबी) प्रमुख एआईजी किरण बज्राचार्यलाई हटाइदिएर एआईजी  श्याम ज्ञवालीलाई पठाए । नक्कली भुटानी शरणार्थीको मुद्दा अगाडि बढाउन र अनुसन्धान गर्न आफैँ खटिएका ज्ञवालीलाई लामिछानेले अन्य टास्क त दिए तर सहकारी सम्बन्धी आफ्नो अनुसन्धानलाई भने ‘लो प्रोफाइल’मा हाल्न लगाए । यो विषयलाई कांग्रेस एमालेका नेताहरूले नजिकबाट बुझेका छन् ।

नक्कली भुटानी शरणार्थी प्रकरणको समयमा उपत्यका प्रहरी कार्यालयमा रहेका ज्ञवालीलाई सरुवा गरेर प्रहरी प्रधान कार्यालयस्थित कार्य विभागमा लगिएको थियो । नेपाली कांग्रेस सत्तामा हुन्जेल कार्य विभागमै रहेका ज्ञवालीलाई रवि लामिछाने गृहमन्त्री भएपछि सीआईबी प्रमुखको जिम्मेवारी दिए । उनी सीआईबीमा पुगेपछि खास केही भएन । सुन काण्डमा कृष्णबहादुर महरा, बाँसबारी छाला जुत्ता जग्गा प्रकरणमा अरुण चौधरी, विनोद चौधरी र बसन्त चौधरीलाई सरकारी वकिल कार्यालयबाटै उन्मुक्ति दिने काम भयो ।

किरण बज्राचार्य नेतृत्वको सीआईबीले लामिछाने मुछिएका सहकारी ठगीका फाइल झिकाएर अनुसन्धान गरिरहेको थियो । रविले आफूमाथि अनुसन्धान गर्ने एआईजी किरण बज्राचार्यलाई त्यहाँबाट हटाएर ज्ञवालीलाई गत चैतमा सीआईबी प्रमुखको जिम्मा दिएका थिए । तर उनले गृहमन्त्री लामिछानेमाथि अनुसन्धान रोकेको भन्दै कांग्रेसले यसअघि चर्को आलोचना गर्दै आएको थियो। हालका गृहमन्त्री रमेश लेखकले नै त्यसको नेतृत्व गरेपछि सो फाइलमाथि फेरी अनुसन्धान हुने संकेत गरिएको छ ।

त्यसका लागि सीआईबीका प्रमुख ज्ञवालीको  सरुवा गर्ने अवस्था रहेको प्रहरी प्रधान कार्यालय स्रोतले जनाएको छ । एक थरी प्रहरी अधिकारीहरूले एआईजी ज्ञवालीको अवकाश हुन एक महिना १८ दिन मात्रै बाँकी रहेकाले उनको सरुवा नहुने पनि बताइरहेका छन् । तर गृहमन्त्रालय स्रोतले भने केही दिनमै एआईजी ज्ञवालीको सरुवा हुने जनाएको छ । उमेर हदका कारण उनी आगामी भदौ २६ गते अवकाश हुनेछन् । यसअघि त्यहाँ आउन खोजेका एआईजी सुदीप गिरीलाई ल्याउने तयारी गरेको छ ।  आगामी मंसिर २८ गते उमेर हदका कारण अनिवार्य अवकाशमा जान लागेका भीम ढकालले पनि रुची गरेका छन् ।

रमेश लेखक गृहमन्त्री भएका कारण गिरीकै पल्लाभारी रहेको छ । यस्तै काठमाडौँ उपत्यका प्रमुखको पनि सरुवा गर्न गृहमन्त्री रमेश लेखकले तयारी गरेका छन् । एआईजी दीपक थापा त्यहाँ गएको ११ महिना भयो । उनको स्थानमा ल्याउने एआईजीको खोजी भइरहेको छ । एआइजी ढकाल सीआईबी जान पाएनन् भने उपत्यका कार्यालय आउने बताइएको छ । तर यो विषय निर्क्यौलमा पुगिसकेको छैन । गृहमन्त्रीले एक लट सबै जिल्ला प्रमुख र प्रदेश प्रहरी कार्यालय प्रमुखहरुको विवरण मागेका छन् । आईजीपी कुँवरले यो विषयमा एक लट गृहमन्त्रीलाई जानकारी गराइसकेका छन् । यो सँगै एआईजी बज्राचार्य र सुन अनुसन्धान प्रकरणमा कारवाही भोगेका प्रहरी अधिकारीहरूले पुर्ववत जिम्मेवारी फर्काउने विषयमा पनि चर्चा चलिरहेको छ ।

त्यस्तै रवि लामिछाने कै विशेष पहल र रुचीमा एसएसपीबाट डीआईजी बढुवा गर्दा तीन तहको छलाङ मार्दै १ नं. मा डीआईजी पडकाएका विवादास्पद दानबहादुर कार्की र डा. मनोज केसीका बारेमा पनि गृहमन्त्रीले नोटिसमा राखेको बताइन्छ । अझ हालै मात्र अमेरिका भ्रमणका बेला उनै कार्कीले रवि लामिछानेका दाहिने हात मानिने रास्वपाका केन्द्रीय सदस्य मोहन थापासँग आईजीपी र गृहसचिवलाई भेटाएर फसाएको विषय पनि चर्चामा छ । मोहन थापा तिनै व्यक्ति हुन जसले रास्वपा सांसद ढाका कुमार श्रेष्ठसँग दुई करोडको रविका तर्फबाट डिल गरेको सार्वजनिक भएपछि राजीनामा गराइएको थियो । उनी अमेरिकामा पनि रवि जस्तै दर्जनौ बैंक ठगी केसमा मुछिएका पात्र हुन् । बेला बेला नेपाल आइरहने थापाले यहाँ बिचौलियाको काम गर्ने समाचार सार्वजनिक भइरहन्छ । उनी रवि लामिछानेका अमेरिका देखिकै विश्वास पात्र साथी हुन । 

आईजीपी कुँवर र गुप्तचर प्रमुख थापाबीच रहस्यमय भेटघाट

प्रहरी महानिरीक्षक बसन्त कुँवर र गुप्तचर विभागका प्रमुख हुतराज थापाबीच बिहिबार दिउँसो गोप्य कुराकानी भएको छ । सिंहदरबारमा रहेका आइजीपी कुँवर थापालाई भेट्न बरफबाग पुगेका थिए । १ः३० प्रधानमन्त्री र गृहमन्त्रीको विफ्रिङ सकेर त्यहाँ पुगेका आईजीपी कुँवर र थापाबीच एक घण्टा कुराकानी भएको बताइउकाे छ । उनीहरूबीच सूचना संयन्त्रको परिचालन र सूचना आदानप्रदान बारे छलफल भएको स्रोतले जनाएको छ । ‘उहाँहरूबीच एक घण्टा छलफल भएको हो, खास सूचना आदानप्रदानबारे छलफल भएको थियो’, राष्ट्रिय अनुसन्धान विभागका एक उच्च अधिकारीले भने । तर अधिकारीहरू भने माओवादी निकट गुप्तचर प्रमुख थापा र आईजीपी कुँवर बीचको भेटघाटलाई लिएर अनेक लख काटन थालेका छन् ।