सभापतिले समयभित्रै पार्टीको महाधिवेशन नगर्ने मनस्थिति बनाएको हो भने कांग्रेस धरासायी हुन्छः कोइराला

४ साउन, काठमाडौं । नेपाली कांग्रेसका नेता वरिष्ठ नेता डा. शेखर कोइरालाले पार्टीको १५ औँ महाधिवेशन तोकिएकै समयमा नहुने शंका बढेको बताएका छन् । उनले सभापति शेरबहादुर देउवाको चाहना महाधिवेशन नगरेर समय लम्ब्याउनेतिर गयो भने कांग्रेस पार्टी धराशायी बन्ने बताएका छन् । उनले देउवाको नाम नलिए पनि नेतृत्व चुक्य पार्टीमा फेरी अस्थिरता बढ्ने बताए ।   

शुक्रबार महानगर समितिका सभापतिहरूसँग काठमाडौंमा भएको भेटमा कोइरालाले पार्टी नेतृत्व र पदाधिकारीहरूको कार्यशैली हेर्दा तोकिएको समयमा १५ औँ महाधिवेशन हुनेमा शंका उत्पन्न भएको बताए । सभापति देउवाले तोकिएको मितिमा महाधिवेशन नगराउने हो भने कांग्रेसभित्र आउने अस्थिरताले आगामी निर्वाचनलाई नराम्ररी प्रभावित बनाउने बताए । 

उनले भने, ‘तोकिएको समयमा महाधिवेशन नभए पार्टी धराशायी हुन्छ । र, त्यसको असर आगामी निर्वाचनहरूमा पर्छ । समयभित्र महाधिवेशन गराउन हामी चनाखो हुनुपर्छ । साथीहरू चनाखो भएर लाग्नुहोला । यसो भएमा कांग्रेस नराम्ररी बिग्रन्छ । पार्टीको तल्लो तहदेखि नै नेतृत्वलाई दवाव दिनुपर्छ । नेतृत्वको चाहना समय थपेर जाऊँ भन्नेतिर देखिन्छ । यो राम्रो कुरा होइन ।’   

कोइरालासँगको भेटमा महानगरका सभापतिहरूले आफूहरूको पार्टी मर्यादाक्रम नमिलेको र विधानले कुनै अधिकार नदिएको गुनासो राखेका थिए । छलफलमा काठमाडौं महानगर सभापति नीलकाजी शाक्य‚ ललितपुर महानगर सभापति सुवानन्द धाख्वा‚ भरतपुर महानगर सभापति चित्रसेन अधिकारी विराटनगर सभापति दीपक चापागाईं  र वीरगन्ज सभापति मनिन्द्र नेपाली सहभागी थिए ।